無情夜冷風,吹散熱情夢:問謝曬皮如何借許冠英消愁

Share on facebook
Share on twitter
Share on telegram
Share on whatsapp


當許冠傑被指不合時宜,與現今價值觀脫節嘅時候,本地插畫家謝曬皮卻能夠以佢嘅一首〈無情夜冷風〉為靈感舉行同名畫展,借舊時代中勾起一份大家都能夠共鳴嘅失落。大家仲有今明兩日最後機會,去中環PMQ睇睇~

問返畫家本人,首歌係佢童年聽阿媽日播夜播許冠傑CD而認識:「印象中佢大部分歌曲都係輕快路線,歌詞有時搞笑有時好浪漫好sweet,唯獨呢首〈無情夜冷風〉聽落特別傷感,所以印象深刻,人大咗再聽對歌詞意境更有體會。」而今次展覽嘅主題動畫用咗 Room307 嘅翻唱版本,謝曬皮覺得佢嘅演繹比前人更有層次,更令人陶醉。


兩者係睇演出時認識,謝曬皮當時就已經覺得呢個人衣著談吐都好難忘,後來再接觸到佢嘅音樂,更係一聽就中:「今次展覽可以用到佢嘅作品,就好似幫我啲artwork塗咗一層閃令令嘅layer咁。」

〈無情夜冷風〉雖然由許冠傑主唱,卻係由許冠英作曲填詞,最早收錄於1974年推出嘅《鬼馬雙星》。至於 Room307 嘅翻唱其實早喺2019年一月上載到 YouTube,由 N.Y.P.D. 南洋派對 結他手 JIPRIP 重新編曲,keep到份情懷之餘顯得更散漫懶慵,幾串左滲右滲嘅電子琴聲聽落又真係閃令令,配合謝曬皮今次以舊香港為主題嘅畫面,實在係一個驚喜配搭。


嚟到2020年,所謂嘅舊香港已經唔只係50或70年代 —— 謝曬皮描繪心目中嘅舊香港時,無論係買少見少嘅露天火車站、公屋後樓梯踢拖煲煙、放喺單車尾嘅大舊喇叭、啟德機場嘅啡黃色調等等,都頗有90年代味道 —— 而呢一切都已經係三十年前嘅事喇。

問起謝曬皮最掛住香港90年代啲乜,佢就表示最響往當時嘅文化同音樂,尤其成年後開始探索:「好似尋寶咁,我好鍾意當時嘅電台同電視娛樂,例如軟硬天師嘅老人院時段,完全冇尺度可言;果個時代風氣好自由,講咩都得,呢種環境土壤都可以為創意提供養份。又好似《龍門陣》呢個電視節目咁,影住一班才子佳人風花雪月,叼住飛煙談笑風生,當時香港擁有嘅廣播自由言論自由,如今已經冇可能重現。」


今次喺 PMQ 展出嘅十多件作品中,有一幅沿用《無情夜冷風》為名嘅點題作,畫面主角係一個坐喺巴士上層聽歌,吹住城市晚風嘅少女。能夠打開窗吹風嘅巴士,亦即係俗稱嘅「熱狗」,望見呢幅畫時,竟然懷念起以前夏天坐上層吹熱風嘅時光 —— 被懷念嘅係果張會痴住大脾肉嘅膠皮長櫈,還是熱風中嘅自由空氣?you know i know.

而最後一班熱狗,早已喺2012年5月9日凌晨0時2分從旺角開出。

同日,由時任立法會議員葉國謙提出嘅《2012年選舉法例(雜項修訂)條例草案》獲得通過。

同年,梁振英當選第三任香港行政長官。

有好多嘢一早已經返唔到轉頭。

《無情夜冷風》畫展 
日期:7月12日 至 7月20日
時間:12-7pm
地點:PMQ Room S209


謝曬皮除咗今次畫展外,亦喺武肺無事忙下完成新書《隔離左右》,紀錄疫情下觀察到香港嘅各種精神面貌,同埋自我隔離時發生嘅兩三事,原定喺今年書展推出,但依家就冇啦,大家去開書店見到都不妨掀下買返本。

Share on facebook
Share on telegram
Share on whatsapp
本網站正使用 Cookie 我們使用 Cookie 改善網站體驗。 繼續使用我們的網站即表示您同意我們的 Cookie 政策。