Travis Scott 超大型巨人化後,虛擬演唱會係咪已經冇盡頭?

Share on facebook
Share on twitter
Share on telegram
Share on whatsapp

有冇人未睇 Travis Scott 上個月喺 Fortnite 場虛擬騷(virtual concerts)?

真心,形容為一場劃時代嘅演出都絕不為過,當日喺office睇完直程啞L咗,從搞手角度去睇更加係mind fucking blown,同埋有啲驚:如果大眾真係接受呢套,咁可能我哋要轉行囉……

單單睇 YouTube 重播都已經驚天動地,對於本身打開機嘅朋友肯定更震撼,意識上真係可以非常接近現場睇演出嘅感覺,呢個正正係細思極恐嘅地方:現實世界邊有得畀你喺 Travis Scott 褲浪穿來穿去,沉落海底玩水母再飛剷入宇宙大爆炸,演出前後仲可以同觀眾互相廝殺?淨係想巨大化 Travis Scott 都已經要等到2046啦……如果第三次世界大戰打唔成的話。

【現實限制 vs 虛擬上限】

回顧返,A$AP Rocky 其實喺2016年 Coachella 已經利用舞台燈光設計玩過「影分身」,新迷幻大王 The Flaming Lips 亦係多年來致力改革舞台概念,2010年香港樂迷就曾經有幸見識過「從陰道來的男人」;日本嘅 Sekai no Owari 強烈嘅獨特世界觀同樣能夠透過舞台設計呈現,而 Gorillaz 以動畫取代真人演出更係前衛。可以咁講,舞台演出嘅本質,就係嘗試建構一個超現實嘅空間,但要去到 Travis Scott@Forntie 嘅程度,技術上始終有太多現實限制。

咁當然亦有 Damian Rice 呢一類單靠個人魅力,就可以帶到過萬觀眾入佢個世界嘅藝人,但係……你明啦

另一個難以突破嘅現實限制,就係「入場人數」,歷史上最多人畀錢參加嘅演唱會由意大利歌手 Vasco Rossi 喺2017年於家鄉舉行,出席人數為 225,173 人,四捨五入當係23萬人啦。免費的話,電音大神 Jean-Michel Jarre 喺1997年於莫斯科,以及老牌搖滾歌手 Rod Stewart 喺1994年於巴西舉行嘅演唱會,兩者都創下超過350萬人參加嘅紀錄。

咁 Travis Scott@Forntie 表現如何呢?依場破格演出錄得超過1200萬名用戶參加,計埋 replay 的話,係總共有2770萬人觀賞,參加次數為4580萬次 ———— 順帶一提,呢場演出亦帶動佢新歌〈THE SCOTTS〉登上 Billboard Hot 100 排行榜第一位。

而作為平台嘅 Fornite 至今擁有超過3.5億名用戶,自去年三月起增長一億名新用戶,係一億啊大佬,如果佢哋有心發展呢一部分,嗌得郁 Nicki Minaj、A$AP Rocky、Billie Eillish 呢類重視影像嘅大牌藝人合作,市場潛力真係無法預計。

其實 Fornite 已經食髓知味,上星期五又搞咗場 Steve Aoki 加 Deadmau5 加 Dillon Francis 三大明星DJ 嘅線上演出。不過格局相比之下就悶蛋好多,只不過係喺你個 screen 入面放多一個 screen,直播綠幕演出,有趣程度甚至比唔上 Forntie 嘅第一個線上演唱會 ———— 另一明星 DJ Marshmello 於2019年嘅演出。點解呢?

【萬大事最終都係要講錢】

畢竟,虛擬又好,現場演唱會又好,都存在一個終極現實限制:錢。一場 Travis Scott 規模嘅虛擬演出,其實需要大量developer用數以月計嘅時間去建立,仲未計美術組嘅起稿修正,唔係咁易量產。但只要決策部門計得到數,動用荷里活級數嘅製作團隊……我哋會好想睇下成品係點樣。

值得興幸嘅係VR技術發展遲緩,就連中國肺炎呢個天賜良機都帶唔起,電影《Ready Player One》式嘅睇騷體驗,短期內未會發生。

另一邊廂,Porter Robinson 又舉行咗一場 virtual 電子音樂節,用 Dreamweaver 程式做骨幹,有真係用燈泡堆砌出嚟嘅舞台,亦有新海誠、綾波麗等日本動畫攝鏡,參加者可以喺各自嘅螢幕上進行互動,甚至有一個虛擬攤位收集慈善捐款,用 Playstation 或者 Twitch 都可以睇到。如果呢個產業真係成形,接下來只係需要考慮如何消費 ———— 香港小型場地「細蓉」上月就搞咗一場收費嘅線上音樂會,利用 Facebook 群組功能,達至網上都可以獨家收看嘅演出模式。

而另一本地單位 Hidden Agenda: This Town Needs 亦正聯同本地演出界、獨立音樂界同舞台專業界籌備緊一場『Tone Online Music Festival』,期望市民課金等一班手足有得開飯,準備全球疫情完結後再掙扎再出發,重現香港 live scene。

如前所述,錢,就係演出業嘅共同限制。你想睇真實嘅 live show 又好,中意 virtual concert 亦好,最緊要知道自己要畀錢。

後記:

關於虛擬演唱會(virtual concerts)有少少拾遺想補充。
.
寫噚日果篇淺談時,其實仲搵到好多料,例如電影《The Irishman》出街後,演出業界原來受戲中運用嘅反老還童 CG 技術吸引,構思將 Bob Marley、Marvin Gaye 等過咗身嘅傳奇搬返出嚟做搵錢機器……講開又講,鄧麗君同黃家駒早幾年都畀人復活過啦。

另外又搵到早喺 Fortnite 之前就已經想推 virtual concerts 嘅公司 Wave,除咗打算將演出者遊戲角色化,亦探索觀眾喺虛擬世界可以如何互動,其中一條橋相當過癮:就係演出進行到某個位,會需要觀眾一齊開槍打大佬,打贏場騷先會繼續 ———— 明顯係轉化自現實中「嗌encore」環節,幾有心思,可惜畫面弱雞咗少少。最近公布會同 John Legend 及 Tinashe 等主流藝人合作活動,都可以期待一下。
.
佢哋句口號係”The show must go beyond”。
.
好 Ready Player One 呀個世界…

Share on facebook
Share on telegram
Share on whatsapp
本網站正使用 Cookie 我們使用 Cookie 改善網站體驗。 繼續使用我們的網站即表示您同意我們的 Cookie 政策。