坂本龍一 x 大貫妙子 只係配菜 —— 從動畫《日本沉沒2020》看over my dead body真義

Share on facebook
Share on twitter
Share on telegram
Share on whatsapp

有無諗過當你嘅出生地唔再存在,你點樣證明自己係咩地方嘅人? 湯淺政明喺最新 Netflix 動畫作品《日本沉沒2020》大膽假設:就算成個島國陸沉,所有倖存國民被迫分散異地,幾年之後,日本國旗照樣可以喺奧運場上如常升起。

講一講個音樂卡士先,主題曲出動「坂本龍一 + 大貫妙子」呢對國寶級嘅老拍檔組合,而動畫配樂則由《聲之形》、《乒乓》嘅牛尾憲輔導航(睇開 Pan Piano 嘅朋友應該非常熟悉佢嘅作品😏)。


劇情主線係主角一群人不斷前進尋求生存機會,但喺湯淺政明一貫歇斯底里嘅天地無情末世觀下,所有死亡都係突如其來,差不多每集都有主要角色退場,而且係上一秒同你傾緊計,下一秒屙篤尿就要俾災難吞噬嘅無常:甩手甩腳、爆頭、搶食腐屍嘅各種殘虐畫面放題。


然而牛尾由故事展開嘅東京日常開始,就鋪上輕盈清爽嘅鋼琴,就算劇情發生大地震後依然一直沿用,唔睇果啲天崩地裂嘅畫面的話,你會以為故事係溫情柔和,呢種聲畫不同步嘅落差,反而更能掀動觀眾情緒 —— 面對太多無情嘅現實,我哋何嘗唔想呃自己話出面一切係正常。


但喺數之不盡嘅死亡,屍橫遍野嘅境況下,每生存一秒都係”over my dead body”,主角群(到劇情未段都稱不上「群」了」中不斷出現無私犧牲嘅情節,死極都望唔見終點,究竟有咩意義?故事後段佢哋更要為咗保存一個「日本重生資料硬盤」,冒死將所有資料上傳到雲端,為嘅又係乜?


睇到呢度,不禁諗”over my dead body”嘅真正意義,唔係要「成全」幾多英雄,而係在於一個民族對「承傳」嘅堅毅。

螳臂擋車又好,壯烈犧牲又好,身處喺人間地獄, 只放大討論XX已死呢啲既定事實,係唔會為呢個地方帶嚟生機!

事過境遷,移居國外嘅生還者以及媒體機構解封雲端上嘅資料,原來當時嘅科學數據,係承載日本有日會再次浮上海面嘅希望;但真正能夠讓「日本重生」嘅資料,其實係該國嘅文化紀錄:傳統建築、和服、節慶活動、流行文化等等影像及文字記載,先係真正構成日本人嘅身份象徵。


呢處所講嘅「文化」自然不獨指high art:試想像有日當你國土盡失,人在異鄉,突然聽到遠處傳來一句「屌你老母吖」,相信都會為此而感到窩心。

真正嘅愛國,往往係一體兩面,如果只係歌頌「日出之國」不死嘅民族精神同制霸世界嘅奧運夢,《日本沉沒 2020》只會淪為政府宣傳片。 湯淺政明嘅作品從不掩飾佢對人性黑暗嘅理解,認為當社會失去秩序,長期受階級壓迫嘅日本人,會立即釋放自私,進行搶掠批鬥,做盡所有你以為只會喺獨裁國家出現嘅卑劣行為。

故事中筆者最喜歡嘅一幕,係見盡日本人各種醜態而夢想移居海外嘅細路,同夢想為國爭光嘅田徑選手進行咗一場 rap battle,能夠坦白表達到國家不滿,我哋先會對國家對國民存有希望。

Share on facebook
Share on telegram
Share on whatsapp
本網站正使用 Cookie 我們使用 Cookie 改善網站體驗。 繼續使用我們的網站即表示您同意我們的 Cookie 政策。