老細,畀次機會:韋家輝、葉問、Ennio Morricone

Share on facebook
Share on twitter
Share on telegram
Share on whatsapp

一個人嘅死訊,有時候係對另一代人嘅呼喚。早兩日意大利配樂傳奇 Ennio Morricone 仙遊,引起唔少人重溫呢位多產大師嘅作品。

眾所周知,Clint Eastwood 近乎永恆地奠定我哋對「西部牛仔」嘅形象,而 Ennio Morricone 嘅配樂則定義西部片嘅世界氛圍,形成所謂嘅“Spaghetti Western”類型片。而除咗為佢贏得人生唯一一座奧斯卡配樂獎嘅《Hateful 8 八惡人》,大家亦都聽過由佢操刀嘅《Cinema Paradiso 星光伴我心》及《1900 海上鋼琴師》兩套經典,咁啱呢排喺香港重新上映,唔入戲院睇,真係正宗大嘥鬼。

其實大師嘅作品亦曾經借TVB劇集,於1992年香港萬家燈火下出沒。由韋家輝監製,大家煲極都唔厭嘅《大時代》第五集,劇情講述方進新(劉松仁 飾)被極限自私嘅丁蟹打到變痴呆,由一代股場大亨變成要喺報紙夾馬經嘅痴呆,全集嘅高潮,就係第一日返工放 lunch 時,劉松仁跪喺地下執筷子,而工頭出糧同時叫佢「你聽日唔使嚟幫手嘞」。


接下來劉松仁由口疾疾講「畀次機會,老細」,到工頭大佬受感動叫佢聽日再嚟試工,成就香港電視上最經典嘅獨白之一,而背後襯托嘅正係 Ennio Morricone 一首〈Deborah’s Theme〉,出自電影《Once Upon A Time In America 義薄雲天》。

點解韋家輝會揀依首歌呢?喺原作中,呢首歌每次出現,都係羅拔迪尼路所飾演嘅 Noodle 單獨思念一生所愛 Deborah 嘅場景;留意返方進新對白,佢堅持要工作嘅背後,其實亦因為「我女朋友一日返兩份工,佢養我,同四個仔女…我…我…男人,好難過」,心痛玲姐(藍潔瑛 飾)要為自己捱。選用〈Deborah’s Theme〉,除咗攞佢盪氣迴腸,亦係借此點出方進新嘅淒苦情意。呢啲咪叫餘韻囉。

同一首歌,二十年後亦被王家衛於《一代宗師》中採用,作為宮二及葉問兩人最後一次見面,於冷雨夜街上漫步嘅背景樂;而當宮二對葉問講「葉先生,說句真心話,我心裡有過你」時,則響起 Morricone 另一樂章〈La Donna Romantica〉。

寫配樂係學問,揀配樂係另一種學問,近年嘅港產片、網劇、獨立電影中,又有冇呢種令人細味嘅選樂例子呢?歡迎留言分享。

Share on facebook
Share on telegram
Share on whatsapp
本網站正使用 Cookie 我們使用 Cookie 改善網站體驗。 繼續使用我們的網站即表示您同意我們的 Cookie 政策。