九頭身日奈班底回歸,9m88 月事新歌大唱姨媽經

Share on facebook
Share on twitter
Share on telegram
Share on whatsapp

相信唔少讀女校出身嘅姊妹都會有類似回憶:當自己或者身邊同學漏咗嘢時(事關月事嘅來臨有時不可預測),都會有人拔刀相助,好似棒球投手咁手拎 M 巾瞄準throw俾果位血流不止嘅隊友,隔幾個座位嘅有需要人士一下瀟灑catch and run,直奔廁格安全上壘。

但離開校園後,女孩子們對月經事宜嘅心態開始受社會目光影響,因為污糟、噁心等標籤而感到尷尬甚至羞愧,換塊巾都要閃縮避忌。9m88 就出咗新歌〈Hello Bye Bye〉嘗試點破種種迷思,毫無顧忌咁訴說月事來潮時嘅心煩意亂。


「玫瑰唇印渲染夜的濃 / 每個月都需要 soul to soul / 只有woman才懂」—— 所有試過嚟 M 嚟到懷疑水星逆行嘅人嚟講,88 嘅歌詞確實一語中的。咁姊妹們不妨聽埋 88 話,與其任由自己生理期折磨,一於學識同佢共處。

今次MV裡面嘅 88化身為「月事精靈」下凡,喺 bossa nova 風格下騷靈獻唱,幽默地將月事苦惱轉化成「一場彷如嘉年華嘅陰性慶典」。


MV 除咗搵返〈九頭身日奈〉嘅拍檔 Sid and Geri 編導,仲請嚟經常以性別入題嘅插畫家 Li Ya Wen 製作動畫,描繪出對月事種種奇想:夢幻嘅畫風、wavy 嘅線條及絢爛嘅用色凸顯嚟 M 時嘅感情色彩,經血流進心型通道融匯成 88 手中嘅紅酒,而酒杯同時又承載住鬧情緒時流下嘅淚水 —— 真係冇想像過,月事都可以係一場咁繽紛嘅感官享受。


作為 MV 嘅精靈主角,88 大秀七款 quirky 富時尚感嘅造型 :有西裝頸巾牛仔帽嘅 88,扎染血紅裙嘅 88,仲有褶皺白色連身裙戴住太陽帽、十足一位時尚「大姨媽」💃🏼💃🏼💃🏼

而眾多 88化身最終回歸成一個自我,寓意我哋都應該與唔同面向嘅自己對話?學歌詞話齋,用智慧去感應生命嘅泉湧,接納流緊血嘅自己,88 就係用音樂去鼓勵女孩子們勇於成為新世代strong and independent woman🥰


順帶一提,兩星期前 88 獲得三項台灣金曲獎題名,包括最佳年度金曲獎、最佳新人獎、最佳單曲製作人獎。喺88發佈嘅 reaction video 裡面睇到,佢得知自己得獎即時感動到喊,一來 88 過去兩年嘅發展以及美學爆發絕對值得肯定,同時亦可以見到台灣音樂圈對於自己地方係相當自豪及有歸屬感。

睇埋另一邊廂同樣獲提名嘅海豚刑警,主唱楊淑芬收到消息時一樣係開心到哭𠹌左,唉有資源有環境養出一個咁生猛活潑嘅音樂圈,真係戥台灣樂迷開心。

Share on facebook
Share on telegram
Share on whatsapp
本網站正使用 Cookie 我們使用 Cookie 改善網站體驗。 繼續使用我們的網站即表示您同意我們的 Cookie 政策。