用套路玩套路,論 LK-072 新歌MV如何認真地鳩

Share on facebook
Share on twitter
Share on telegram
Share on whatsapp

由於 Netflix 最近上架嘅處境喜劇《Community》大熱,而令觀眾對「套路」呢個創作概念有更深嘅認識,事關成套劇就係不停以流行文化常見嘅套路為前設,去鋪陳各種離哂譜嘅劇情同場景,由喪屍片到戰爭片再到高中青春歌舞片再返去處境喜劇本身乜都炒埋一碟香噴噴,細節位極多,可以話影癡程度愈深睇得愈過癮。

劇中主角之一 Troy(由未化身 Childish Gambino 嘅 Donald Glover 飾演)曾數次提起 ”meta” 呢個單詞,字源希臘文 μετά,解作「後設」,香港可以勉強譯為「惡搞」或者「二次創作」,但始終點唔出「創作有身為創作嘅自我意識」呢一點。

呢種後設式創作其實承傳已久,以事事講究系統化嘅日本為例,玩起meta同樣有世界級表現,遠有北野武嘅《奏鳴曲》以及伊丹十三嘅《Tampopo》等經典,近代《屍殺片場》以及《黑幫有個荷里活》兩者亦係反類型佳作,當然仲有《銀魂》啦。由於「套路」原先就係輕視原創性而追求類型化,為加速產量而出現,本質極盡商業,反類型片本來帶有強烈藝術性及批判性,但以 Marvel 嘅《Iron Man 1》以及《星際異攻隊》系列為例,甚至《Community》創作班底嘅新作《Rick & Morty》,一樣充滿反類型片嘅戲謔元素,可見後設式創作已經成為另一「套路」。

過去十幾年不論時裝、流行樂或娛樂都以「致敬/復古」為大方向,人人大喊悶蛋之餘,往好處想,亦反映過去文化遺產中依然存在許多未被完全開發嘅概念;隨住meme近兩年正式成長為大眾文化巨獸,玩套路已經成為十分入屋嘅創作/閱讀思維。然而好似 LK-072 咁清晰用meta手法玩音樂嘅創作單位,香港暫時仍然算係少見。

LK-072 – 告訴我SaySo 單曲封面

(sor,講咗咁耐先入正題,事關明白咗套路嘅玩法後,睇 LK-072 嘅作品會易解啲)

由情侶檔 Locka 加 NatureHin(話梅鹿)組成嘅 LK-072,於2018年底發表首個作品〈ち んこマンコ 〉玩 ThisAV,及後實驗過:梅艷芳、Trap、City Pop、昭和風情、林志美、J-Rock、vaporwave 等元素。

今次〈告訴我SaySo〉改編自受惠於抖音 “dance challenge” 而爆紅,洛杉磯歌手 Doja Cat 兩個月前發表嘅新歌〈Say So〉,Locka 表示想喺原曲嘅復古味道上強調少女感:「對我黎講呢種美學最強烈嘅就係90-00年代,受日本文化影響下嘅香港。貼紙相機,五顏六色嘅首飾,視覺上都同我哋首歌帶出嘅感覺好配合,而朋友studio又咁啱有塊大綠幕,所以MV亦決定向呢個方向做。」

LK-072 由一開波已經係sound & vision同步發展 ———— 目前每有新歌都係直接以MV形式推出,除咗 YouTube 外亦暫時未會喺音樂串流平台上聽到佢哋嘅作品。話雖如此,LK-072 並非純為拍MV而做歌,製作水平合格,音樂上亦屢屢有類型片特性「反高潮」嘅運用,例如前作〈Wreck〉1:14~1:44果段單薄嘅粒粒結他solo,以抽走所有pedal嘅方式令你意識到平時啲結他真係落咗好多味精;今次〈告訴我SaySo〉亦有類似處理,將0:43果聲「一個人」擺到好後,營造有意為之嘅兀突,編曲角度睇其實都幾meta。

今次亦係繼前作〈記憶中的舞蹈〉取材中原めいこ後,LK-072 第二首改編作品,被問到係咪有更多心水想,Locka 就希望以保留復古元素嘅前提下探索自己風格,City Pop 產物依然係重要嘅研究對象,佢特別推介森高千里:「佢嘅mv喺果個年代行得真係好前,有種莫名其妙嘅魔力令你繼續睇落去,好鍾意果種尷尬生硬但又充滿自信嘅舞蹈(以現代審美準則黎講),十分值得一看。」

相比其他香港嘅獨立音樂單位,LK-072 對於跳舞的確較為放膽,亦見成效。今次加入嘅另一女生 lee3gou 原先係嚟幫手化妝工作,由於 Locka 自言唔識rap而自薦玩埋一份,嗱,rap嚟講呢,咁 lee3gou 表現都唔可以話好出色嘅,但係貫徹到「過癮」行先嘅理念。據講佢將會有個人作品,抒發被拖欠三千大元(難道係……耶穌差我三千蚊,依家仲未還,唏?)嘅怨氣,似乎會係另一玩味之作。

講到尾,LK-072 目前畀人觀感依然係一場朋友間嘅開心鳩玩,不過認真地鳩,總好過認真但原來係鳩,何況呢種sound & vision立體化嘅美學建構已經係全球大潮流,行快兩步,無壞。

Share on facebook
Share on telegram
Share on whatsapp
本網站正使用 Cookie 我們使用 Cookie 改善網站體驗。 繼續使用我們的網站即表示您同意我們的 Cookie 政策。