金巴道理農場

金巴利道路真理生命

一場思念性夜間失眠 : 金巴利道路真理生命 新碟搶先聽後感

首先感謝 金巴利道路真理生命 畀我哋預先試聽《金巴道理農場》,由台灣 SEED TOSS 及廣州 琪琪音像|Qiii Snacks Records 聯合實體發行卡式帶專輯,香港樂迷亦可於本週六(7月11日)喺灣仔富德樓發布會現場購買。
.
講返隻碟,試聽時第一個直接反應係以為自己開錯file。
.
因為我認識嘅金巴利道路真理生命(下稱金巴)係混雜的、實驗的;但開首曲〈Nightfall〉聽落十分清涼,完完全全係本地民謠好手 Tomii Chan 嘅聲紋,所以我好肯定自己開錯 file。但係再睇返source,又真係金巴利道路真理生命嚟㗎喎,冇理由喎,點解會玩得咁 folky?再望埋 credit,原來又真係有 Tomii 份。

OK,即係眼前有一個全新嘅生命體,有新人加入,總共由11個人聯合組成。喺多出一倍人參與嘅情況下,佢哋玩出嚟效果反而比變得比以往更加 minimal:

時間上,呢張專輯長度比 EP《金巴利道路真理生命聯合》更短;音色上,一反金巴以往工業噪音嘅印象,亦抽走標誌性嘅電影對白採樣(sampling)以及極度失真嘅vocal﹐取而代之係 Tomii 清涼嘅木結他演奏,與更多留白嘅喘息空間,唯一不改嘅,係傾向 post-rock 嘅結尾方式。

全碟變化起伏不大,仍佛等待著某樣唔會發生嘅事情,一切都喺呢幾十分鐘過程中緣生緣滅,聽到尾先發現自己喺無意識嘅等待中,投入咗自己嘅精神(is that 本真?)。

生命體主要成員 Teeda 形容金巴利道路真理生命係一個 collective,佢可以係空殻的、全有的、可以係全然無機的、亦可以係無處不在的。畢竟佢哋係「道路真理生命」,用樂理分析拆解金巴音樂,就好似用人類道德標準去批判神嘅旨意一樣咁不智,咁徙勞 —— 我哋需要做嘅,係成為一個見證人。

金巴道理農場 | 專輯發佈音樂會
日期 / Date: 11 / 07 / 2020 (SAT)
時間 / Time: 7:30 pm door
場地 / Venue: 富德樓 天台
演出單位 / Groups: 金巴利道路真理生命 及神秘嘉賓s
票價 / Ticket: 200hkd
//
最後,容我嘗試畫面化呢張專輯嘅感覺。

從《金巴道理農場》歌單去睇,可以觀察出一個思緒時序:1. Night Fall,2. Night Fall Interlude,3. Midnight,4. Three Hours,5. Maybe,6.Closure,我哋不妨稱之為「思念性夜間失眠」。

大家有冇試過點都訓唔著,好精神嗰種狀態?你望出窗外感受到夜間嘅地熱,但迎面而來嘅卻係沁涼晚風,摸下床邊空出嘅位,心入面自然湧起零碎未有講出口嘅說話,雜陳嘅感覺就喺字與字之間浮現……冇㗎,囉囉攣,就係仲掛住。

兜兜轉轉,感覺始終係何志武嗰一句:你仲未好返啊?

Mordechai

KHRUANGBIN

你知道嗎?近年已經冇乜後生會跟 Pitchfork 去搵碟聽。除咗因為受壓 Spotify 同 YouTube 超乎強大嘅演算法,亦因為 Pitchfork 當年最出位嘅牙尖咀利,已經逐漸扭曲成品味失格嘅包拗頸,例如德州泰式迷幻號 Khruagbin 上禮拜推出嘅新碟《Mordechai》,佢哋竟然夠膽死畀58分


自從2018年嘅《Con Todo El Mundo》一爆而紅後,Khruangbin 已經係潮到會上《紐約時報》《Vareity》嘅明星樂隊,加上佢哋音樂風格嘅迷幻調性,不期然令我諗起《Lonerism》同《Currents》時期,一腳踩哂主流兩邊岸嘅 Tame Impala。


「旅行」一直係 Khruangbin 鍾情嘅主題,甚至專程開咗個website幫你砌搭飛機時可以聽嘅playlist。佢哋每次演出時,會將自己設定為剛剛降臨地球嘅外來人類(真係㗎,訪問講㗎),對所有民族音樂文化都興致勃勃,遊歷東南亞街巷、探索中東秘境、往加勒比群島取經……借此深化樂隊包羅萬象嘅風格美學。


然而今次新碟靈感嘅飛行里數,比以往要短得多。趁住上年tour空檔,低音結他手 Laura Lee 自己一個去咗行山抖抖氣,途中認識咗一位叫 Mordechai 嘅朋友,相處過程不斷觸動佢回憶自己嘅家庭成長,最後,再喺佢一家大細陪伴下去到一處山林瀑布。而呢張《Mordechai》就係因為咁而由以往嘅大江南北,濃縮為 Lauren 從瀑布一躍而下嘅體會。

概念有變,但新碟依然充滿你所熟悉嘅 Khruangbin 特色:踩住心口律動而上嘅bassline、沉穩但又極富存在感嘅光頭鼓佬groove、以及明明彈得好快好密質質偏偏聽落好鬆馳嘅結他。


而最明顯嘅改變,係樂隊今次編入大量人聲歌唱部分,由 Laura 主導,畢竟今次《Mordechai》係屬於佢嘅故事,從寫畀 Laura 外公嘅〈Dearest Alfred〉中,我哋能夠感受到樂隊由大我回溯小我嘅轉化。

全碟最得我歡心嘅一首〈So We Won’t Forget〉,歌詞同樣流露深刻個人情感,尤其果下「嗚~」,頗有福音合唱(gospel)嘅味道,正好係結他手 Mark Spreer 同鼓佬 Donald “DJ” Johnson 當初相識嘅原點(佢哋以前同 Beyoncé 返同一間教會)。

無論向外闖到幾遠幾闊,最終要探索嘅依然係自己個根。


但係切記一樣嘢,根源並不等如過去,香港早已注定返唔到轉頭,你將要決定嘅係跟隨恐懼嘅節奏過活,還是走上街道,呼喊內心相信嘅旋律。

講到尾,到底乜嘢係旋律?旋律就係勾引你耳朵,思緒不停向前邁進嘅人為聲音設計。

優秀嘅旋律,應該係每一粒音響起時,你都仿佛知道下一粒音會落喺邊度,但最終卻係帶你去到一處偏離想像以外,但似乎更加美好嘅境界。

時代亦如是。


推介曲目 : If There is No Question、Pelota、One to Remember、So We Won’t Forget

Miss Anthropocene

GRIMES

電子流行女歌手 / 視覺藝術家 Grimes 日前喜誕麟兒,爸爸 Elon Musk 喺Twitter話小朋友將會命名為「X Æ A-12 Musk」,明顯係致敬媽媽今年新碟嘅其中一首印度風歌曲〈4Æm〉。

連改個bb名都要咁風格化 ———— 老老竇竇,自從2015年隻《Art Angels》後,對 Grimes 嘅認知已經變得類近 Radiohead,佢嘅音樂作品唔再係單純用「好唔好聽」去理解,而係無可避免要跌入拆解隱藏訊息呢個套路。

呢五年間,Claire Boucher 作為 “Grimes” 已經愈來愈明顯想擺脫「人類」呢個身份,創作定位上亦係藝術家多於音樂藝人,仍佛生存於一個名叫「藝術天使禁獵區」嘅異世界。咁呢個presentation當然唔係乜新鮮事,遠有 Sun Ra、Buckethead 同 Slipknot,近有 Arca 同 FKA Twigs,透過非人化嘅角色扮演,的確有助觀眾代入佢哋想表達嘅抽象概念。

《Miss Anthropocene》係 Grimes 嘅第五張專輯,名稱中嘅 “Anthropocene” 係指地質學中嘅「人類世」,泛指人類進入工業世代後,大範圍影響地球原有生態嘅階段,而呢隻碟正係探討地球暖化、人工智能等大議題。但睇多兩篇 Grimes 訪問,又發覺佢放咗唔少自己嘅私密情緒入去,譬如〈So Heavy I Fell Through The Earth〉,其實係描述 Grimes 決心懷孕後,隨之對「母親」呢個角色嘅囚禁感到沈重壓力,不過佢唔講你未必會知首歌係咁解囉。

音樂層面,維持佢嘅 ”ADD Music” 風格,將所有能夠刺激感官嘅元素大包大攬:trance、metal、台灣rapper潘PAN(a.k.a. 貍貓)、cyberpunk、ethereal wave、Lip Peep 嘅死、rave、goth、外星人、極權、女權、witch-house、生物機械、未來主義、John Wick……對於喜歡拆解嘅朋友嚟講,一定愈聽愈有趣。

更佩服嘅係佢中意玩得咁複離之餘,依然可以緊緊捉住流行文化條水。淨係啲MV都已經留得住班fans啦。

你問我哋呢,其實最掛住咪又係2012年喺運動場上彈嚟彈去,唱住〈Oblivion〉果個 chill chiil 漂染大鼻妹,不過唉,人哋冇責任跟你想像條路行㗎嘛。

佢依家係就係中二病美學到極致,但諗得出,實行得到,旁觀者不得𪘲牙聳䚗(依牙松杠)。

Migration Story

M. WARD

結他音樂好難死得透。

正如 Alex Turner 喺2014年嘅 BRIT Awards 話齋:有時佢好似沉咗底,但終有一日又會喺你天花板爆返出嚟。

It’s always waiting there, just around the corner. Ready to make its way back through the sludge and smash through the glass ceiling, looking better than ever. Yeah, that rock’n’roll, it seems like it’s faded away sometimes, but it will never die. And there’s nothing you can do about it.

Alex Turner, 2014

現存最優秀嘅藍調/民謠結他佬之一,波特蘭名產 M. Ward 正係一個好例子。每次聽佢,你都會發現原來木結他嘅聲音依然可以打動到自己,今次新碟《Migration Stories》亦不例外;除咗一首〈Stevens’ Snow Man〉略嫌太古典之外,其他每一首都何止聽到人暖在心頭,直頭係生命值 +1 再 +2 。

作為 M. Ward 第十張個人大碟,佢創作時係以阿爺當年由墨西哥偷渡到美國嘅往事為藍本,旨在重溫人與人之間嘅熱度,多少受到美國近年備受爭議嘅移民政策影響;好似佢2006年嘅經典作《Post-War》,借用老布殊及切尼年代嘅戰後低迷,去表達自911事件後,美國人對於伊朗戰爭嘅恐懼抑鬱。

然而《Migration Stories》今年推出嘅時間點正值歐美受疫情侵襲最嚴重嘅時期,全球各國都對外封關,世界既慌亂,又好耐都未試過咁安靜,正如全碟最有活力嘅一首歌〈Unreal City〉中,M. Ward 唱道 : I found peace in the unreal city.

連佢自己都話呢呢隻係寫畀亂世嘅科幻大碟。

整體音樂表現上,去到 M. Ward 呢個層次嘅唱作功力,旋律已經係開水喉咁順便,編曲繼繼無敵,呢度又執執『Q Magazine』口水尾 : Ward continues to set a standard few other artists can match. 班底加入 Arcade Fire 嘅 Tim Kingsbury 以及 Richard Reed Parry,作用喺另一首〈Independent Man〉上最明顯,有纖細嘅synth聲融入拍子,夏夜晚風一般嘅色士風攝出攝入,配合大叔特有嘅純樸深情獻唱,聽到人內心跟住不停叫喚 : I need you so, so, so bad.

我都需要,你又需要,大家都需要每日平平安安過。

What Kinda Music

TOM MISCH & YUSSEF DAYES

– 坦白講,呢隻冇乜fun fact可以吹,只係一隻完成度極高嘅 jazzy soul dreamy R&B 專輯
– 可以偷懶形容為更鬆軟,更易食嘅 BADBADNOTGOOD
– 整體上比 Tom Misch 上一隻大碟《Geography》更加夢幻,層次分明但輕盈
– 亦係南倫敦爵士大名 Yussef Dayes 深潛多時嘅首張完整錄音作品
– 啲結他solo都幾英雄主義,唔怪得 John Mayer 咁中意佢
– Yussef 手鼓玩groove高手得嚟好易入耳
– 三位嘉賓 Freedie Gibbs、Rocco Palladino、 Kaidi Akinnibi 各自表現出色

如果才華可以抗疫,咁呢隻 Tom Misch 聯乘 Yussef Dayes 嘅大碟《What Kinda Music》起碼可以幫成個英國頂返兩三個月。

兩位同樣出身倫敦南部,前者係近五年來有口皆碑嘅 multi-instrumentalist,以靚beat充滿時尚感R&B,上年起聲勢已經直追同一派系嘅 FKJ;後者來自前衛爵士名團 Yussef Kamaal ,係近十年當地最重要嘅旗手之一,話哂係同鄉,相信兩位才子早已惺惺相惜情不自禁,今次終於有機會行埋格劍。

Tom Misch 兩年前推出嘅處男大碟《Geography》好聽還好聽,但用聲稍嫌太過乾淨企理,冇乜人味;今次有 Yussef 負責做beat控場,氛圍偏向深邃晦暗,包返實 Tom 嘅一把登台級靚聲,成隻碟嗒落有底有面,襟聽好多。

兩位高手揉合 electronica、舊派嘻哈,實驗、guitar hero 等不同元素,尤其係 Yussef 帶嚟嘅深層滲透,令 Tom Misch 本身已經有點jazzy色彩嘅風格,進化為易入口嘅前衛爵士。加入客席樂手嘅三首作品 : Nightrider、Lift Off、Storm Before The Calm 可以話係全碟highlight位,充份發揮 Tom 嘅製作人基因;而大碟同名曲〈What Kinda Music〉就最表現到 Yussef 用節奏突顯旋律嘅加乘作用,個小提琴入得好淒美呢。

兩位今次合作愉快,亦係近代「夾嘢」呢個創作模式嘅轉變寫照:以前夾band最緊要夾人,無論化學作用有幾勁,若然人唔夾,終究會好似 Kobe 同 O’Neal 咁分道揚鏢。然而嚟到2020年,大部分音樂人都有獨自實踐創作嘅能力,變相大家有咩新作想要取長補短,只需要搵啱咀型啱理念嘅同行短暫合作,互相feature,基本上隔住幾個傷心太平洋都一樣work;往往蜜月期未過就已經完成作品,無需深交,就算唔啱都係一次咁大把,確係有彈性得多。

Truth or Consequences

YUMI ZOUMA

// 極短評 //

首先,想講樣諗到好耐嘅無聊嘢,Yumi Zouma 嘅中文應該譯做「裕美騷麻」。

我哋可以將呢隊紐西蘭 electro-pop 視為一位靚女看待,每次出現可能換咗髮型換過條裙,但你嘅第一感覺依然會係:幾靚喎。

新碟《Truth or Consequences》延續固有風格,製作依然又美麗又涼快,由開場曲〈Lonely After〉就聽到個心彈下彈下,乾淨明亮嘅粒粒結他,沙沙蔓蔓嘅 kick & snare 不停敲擊腦皮,再有流星雨咁款嘅synth墊底 ———— 加上女主唱 Christine Simpson 運聲已經係圓滑到咩mood都carry得起,唔覺唔覺已經一口氣聽到收尾嘅〈Lie Like You Want Me Back〉。

全碟每一首都係你聽見前奏已經唔想skip,做歌做到咁真係幾勁。

如果你近排想搵啲可以鬆馳解壓,又唔使太專心聽嘅音樂,Yumi Zouma 呢隻新碟絕對合格有餘,擺埋前年隻《III EP 》play next都仲得。

Summer Breeze

PIPER

// 復刻系列 //

想唔想去返1983年嘅夏天?

2020年仲講 City Pop,除咗因為八十年代嘅精良製作經得起時間考驗,同時因為現實世界所有失去嘅美好,仍佛都可以喺物質富裕東洋中搵得返,

由結他兼主唱山本圭右領軍,濱松市樂隊 Piper 活躍於1981至1986年間,係 City Pop 呢個新金礦中被淘下淘下浮返出嚟嘅新一員,最近由 Light In The Attic 發行佢哋嘅經典大碟《Summer Breeze》。

坦白講,唔少 City Pop 名盤聽上去大同小異,始終骨格上唔會離 Boogie 呢個大綱太遠,就算有人中意間宮貴子唔中意竹樹瑪利亞,有人中意角松敏生但唔中意佐藤博,有人中意大滝詠一但唔中意山下達郎 ———— which is impossible,邊可能有人唔中意山下大叔 ———— 呢啲好多時只係口味差異問題,唔會改變 CIty Pop 誕生就係為咗取悅觀眾,令佢哋feel good / feel naughty嘅本質。流行無罪,只要搵到自己啱聽嘅聲就ok。

位於觀塘嘅唱片鋪 Analog Dept. 形容《Summer Breeze》為一場「就算秋天聽見都依然會立刻想去沖繩衝浪」嘅浪漫。其實全世界有幾多人去過沖繩衝浪吖,但 City Pop 正正係有呢種魔力,只需要一首〈Shine On〉,就可以令你投入到果個美好到虛幻嘅世界,無論過多幾年,你係乜嘢人,一聽見就會聯想起陽光與浪花。對於中意呢種畫面嘅朋友,我哋同時推介鈴木茂嘅《Lagoon》同埋角松敏生嘅《Weekend Fly To The Sun》。

唔順路去觀塘嘅朋友,前排見深水埗 White Noise 一樣有入貨啊。

Cenizas

NICOLAS JAAR

// 極短評 //

有啲artist個名本身就係質素保證。你未必啱聽,但聽落總會覺得「好似幾犀利」,Brian Eno 如是,Four Tet 如是,Oneohtrix Point Never 如是,智利裔嘅電子製作人 Nicolas Jaar 絕對係此類人物。

2011年,廿歲仔嘅 Jaar 憑住處男大碟《Space Is Only Noise》一鳴驚人 ———— 果陣真係成個underground都講緊佢㗎 ———— 2013年參與嘅 Darkside 坊間同樣叫好叫座,仲嚟過香港開騷。然而世界對呢類帶有拆解、形而上、實驗性嘅音樂始終好難長期熱,Jaar 亦要分身兼顧自家廠牌 Other Music 嘅營運,但每有作品 Pitchfork 最少都畀7.6分。係值嘅。

而佢所有音樂都建構出相似嘅風景,將思緒帶列某個冬天嘅海邊,柔情欠奉,頭腦清明,個人認為相當適合度橋/寫稿/執相/思考人生時做背景樂。

順帶一提,Jaar 喺《Cenizas》創作期間同時以 Against All Logic 之名發表《2017-2019》,走舞曲路線,老實講,早兩年聽見 A.A.L 前作《2012 -2017》亦係相當中意,但完全唔知背後大腦原來就係 Jaar,身份呢家嘢,喺電子世界難免比較抽象。

R.Y.C.

MURA MASA

– 23歲仔,格林美提名level製作人嘅全新大碟
– 有英倫搖滾味,幾驚喜
– 採樣大量 post-punk、Britpop、emo,以電子流行模式重現band sound
– 少女偶像 Clairo、Ellie Rowsell 助陣
– track 1, 2, 6 最好feel:青春,焦慮,同時迷失
– 私心推介 Ned Green 講故仔果首〈A Meeting at An Oak Tree〉,係淡淡然嘅憂傷

認識 Mura Masa 呢位新生代製作人,係透過佢2017年嘅同名大碟,睇返 The Line of Best Fit 嘅介紹,話係一場星級陣容大party,咁對比兩張大碟guest list其實就可以知道前後有幾大分別。

當年最大牌嘅係 A$AP Rocky、Charli XCX 同 Damon Albarn,後者雖然都係一代英搖王,但轉型做百變星君都快廿年了,前兩者就同 band sound 扯唔上關係,整體嚟講其實似當年 Spazzkid 果類碎拍chillwave嘢;而今次《R.Y.C》則有 Wolf Alice 嘅女主唱 Ellie Rowsell,一首〈Teenage Headache Dreams〉可以視為樂隊前作〈Don’t Delete The Kiss〉嘅姊妹作。

Masa 一向都好識運用編曲迎合對手,譬如有 Clairo 獻聲嘅〈I Don’t Think I Can Do This Again〉,Masa 就特意為女方堆叠出強勢音場,配合呢位睡房派小公主經過大量音樂節演出歷練後,想要走硬朗獨立路線嘅企圖心。而有同鄉Grime系新秀 slowthai 跨刀嘅〈Deal Wiv It〉,係一首難得清秀嘅英倫爛佬機關槍。全碟唔少轉折位都用返結他sample,鼓底亦頗有post-punk硬錚力水。

然而全碟最順耳嘅依然係 Masa 自己一腳踢嘅〈Raw Youth Collage〉、〈No Hope Generation〉,〈Vicarious Living Anthem〉三首,基本上同每首歌名提示嘅風景差不多,青春疾走迷惘。雖然佢一如時下大部份年輕製作人,利用auto-tune去處理自己把聲,但唔會推到過火失真嘅程度,風格化之餘,想講嘅嘢依然清楚明白,呢點值得稱讚。

年輕樂手以個人單位重塑 band sound,其實已經係潮流而唔係趨勢,都會好想問:將來會唔會冇人夾band?

Sing in a World That’s Falling Apart

BLACK LIPS

– 亞特蘭大老牌punk友
– punk係一種取態,唔係一種形式
– 所以就算佢哋轉玩鄉村藍調,個感覺一樣係迷幻、古鳩怪
– 推薦歌曲:Hooker Jon、Rumbler、Gentleman、Angola Rodeo、Locust
– 色士風手 Zumi Rosow 靚得啜核,Gucci 上年以佢為靈感女神推出全新簽名手袋「Zumi」
– 由 VICE 做發行,冇錯,係網媒果間 VICE

可以用一句話嚟總結 Black Lips 嘅第九張大碟:Country music, where all the good punks end up.

以上評語由 YouTube 用戶 ”rory mcclure” 提供。

Punk到盡頭,有人就會開始轉channel講怪談。正如你聽 Iggy Pop 其實係必需要聽埋〈In The Death Cars〉同埋〈Les Feuilles Mortes〉呢兩首,前者用探戈格局講車震回憶生與死,後者為反串 Leonard Cohen / Serge Gainsbourg 嘅法文香頌,同你聽〈Lust For Love〉所認識嘅 Iggy 大相逕庭,但一樣係咁怪異而真心。

講返 Black Lips。2005年嘅《Let It Bloom》將garage punk招牌省到靚一靚後就浮浮沉沉,成員更替,直至2017年有色士風手 Zumi Rosow 加入,又搵得返第二春。正如 Gucci 上年以 Zumi 為靈感女神,推出簽名手袋,Black Lips 將呢位新成員嘅崚角發揚光大:嫵媚、異常、鮮艷、狂放,淨係聽一首〈Crystal Night〉已經感覺渙然一新。

加上 Zumi 呢位另類超模,入屋程度係連香港嘅 Vogue 同 MING’S 都會報導,樂隊喺歐美嘅機遇自然有所增長。

嚟到今年嘅《Sing in a World That’s Falling Apart》投向country懷抱,得益於主唱 Cole Alexander 地道嘅南方口音,呢個轉化聽落非常順滑,仿佛 Black Lips 咁多年來一直都係玩迷幻鄉村音樂。譬如〈Angola Rodeo〉果啲全隊大合唱action位,簡直浮現出一堆小麥排住隊變啤酒嘅雀躍畫面;另外〈Gentleman〉編曲三段變化亦係愈聽愈好味,每個爆位都充分發揮管樂以及steel guitar嘅感染力,去到尾甚至玩出少少太空意味。

講返轉頭,要聽過 Black Lips 本身係有啲難度,如果你上 last.fm 同 Spotify 查一查,就會發現佢哋係同 The King Khan & BBQ Show、Night Beats、Nobody、Ty Seagall 放埋一齊,全部都係挨近indie圈嘅邊緣,有口碑但無人聽。今日你有機會接觸其中一隊,乃實係福氣呢。