神隱 Spirited Away

YoungQueenz


一個月前,香港樂迷迎來 YoungQueenz (YQ) 首張個人大碟《神隱 Spirited Away》,大家呢幾年一直𥄫到實等佢幾時再drop新歌時,又點會諗到佢IG嘅幽靈公主San頭像,原來就係最明顯嘅sneak peek。按經理人Tedman Lee喺IG嘅說法,原來此碟早於2018年《龍寨 DRAGONTOWN》歐洲tour已有雛形。

但那等候耶和華的必從新得力。他們必如鷹展翅上騰;他們奔跑卻不困倦,行走卻不疲乏。

以賽亞書40章31節

留意返 Youngqueenz 喺新碟第五track〈~ 4031 ~〉嘅歌詞,會見到一串密碼:ISA40;31。

從《神隱 Spirited Away》封面就可以知呢張碟與舊約聖經有連結,攤開〈神的森林〉、〈肋骨〉、〈蛇果〉三首歌名,YQ 明顯係引用緊《創世紀》中嘅伊甸園、夏娃、知善惡樹等概念,亦喺〈神的森林》直言:這故事關於你與我與上帝。因此,按線索喺 Google 搵出《以賽亞書》嘅經文其實都不算意外。


《以賽亞書》係以同名先知為主角,喺舊約嘅定位有少少似新約前傳 + trailer,上卷交代猶太國/耶路撒冷敗亡衰落嘅經過,下卷則預告會有彌賽亞出場打救世人,穿鑿附會地去睇,當然可以聯想到畀中國收返之後嘅呢個地方。

雖然〈~ 4031 ~〉段經文會令香港人諗起2019年各種街道上奔走嘅記憶,但歌詞主要圍繞臍帶/磁帶/母體/疤痕,也許係記錄 YQ 更私人嘅情感,but you know what?一句說話講得講究的話,當然係可以同時講緊幾樣嘢。甚至乎〈~ 0121 ~〉中,YQ 選擇以ambient純演奏方式詮繹詩篇121章:白日,太陽必不傷你;夜間,月亮也不害你。直接由得觀眾自行理解。

如果想聽 YQ 對現況嘅睇法,或者〈蛇果〉中呢段會比較直接:

混沌嘅城市有邊個能拯救自己?精神已萎靡 達到了世界嘅邊緣 被邊緣嘅我哋 只能夠離開或消失如鬼魅

YoungQueenz〈蛇果〉

另一方面,碟名《神隱 Spirited Away》直指動畫《千與千屬》呢點則無需解話,尤其喺音樂質地上,碟中蘊藏許多帶有久石讓(Joe Hisaishi)風格嘅sound design,譬如將人聲sample成organ咁用、大量加入馬林巴(Marimba)等木琴(Xylophone)類敲擊樂器、著重panning建築立體感嘅混音手法等等,都令整張《神隱》充滿東方神話色彩,法國監製 Hyke 值得一讚 。


但與其從宮崎駿動畫配樂中尋找《神隱》嘅靈感,似乎喺久石讓為北野武早期電影所寫嘅歌曲更啱數,例如《那年夏天,寧靜的海》嘅〈Silent Love〉,以及《壞孩子的天空》中嘅磅礴史詩〈Meet Again〉,依家再聽係完全想像到 YQ 喺上面rap會有咩效果。


電影感向來係 YQ 嘅風格特質之一,以 Otaku Mobb 名義發表嘅《御宅 – OTAKU MOBBIN’》有連貫主題;前作《龍寨》直程係將港產片予外國人嘅印象以soundtrack形式表現,配合MV營造出一個科幻江湖;甚至由佢與 GrymeMan 建立嘅廠牌名字 Wild$tyle 都係源自 Charlie Adhearn 喺1982年嘅同名電影;去到《神隱》,YQ 嘅敘事方式又再進化,懂得利用編曲將一首歌拆解成三幕劇咁款,hip hop一般都係揼個靚beat做骨幹再喺上面龍飛鳳舞,但今次除咗〈War (Love Is A…!)〉之外,全碟每首歌頭尾個beat都係加減到截然不同,愈聽愈覺得用hip hop嚟界定呢張專輯有少少古怪(可能廿幾年前 US3 呀 cLOUDDEAD 果啲已經試過 but that’s not the point),某程度上你可以話佢係cloudrap,但點標籤呢啲嘢其實唔重要啦。

用通俗例子嚟講,即係 Queen 首〈Bohemian Rhapsody〉呢,咪好似將三首歌駁埋做一首但又穿得通嘅,YQ 今次啲歌好多都有類似企圖。


YQ 嘅另一特色係佢果把有人歡喜有人憎,落咗distortion嘅「嘔泥聲」,嚟到今次柔軟得多,喺結尾曲〈告白〉尤其明顯 —— 話說見到歌名即時諗起同廠牌 Matt Force 首〈告別〉 —— 有別於 MF 嘅生者角度,YQ 代入幽靈心境去講述佢對死亡嘅思考,寫下個人與大局嘅觀察,更能聽見佢處世嘅心態變化,係全碟最觸動我嘅一首。

特別想提最後一句「我安靜地離開……留下了鞋在海岸邊」,既令人諗起自殺習俗,亦可以象徵一顆靈魂放下因緣move on,但究竟喺 YQ 心目中away咗嘅spirit係誰人呢?作為觀眾嘅我哋也許唔應該深究。


但呢張碟仲有非常多值得挖嘅位,篇幅以及能力所限就算了:〈幽靈! 幽靈!〉1:08起果段扭到好似電結他嘅人聲、尾段與 Cornelius 首〈Magoo Opening〉離奇地相似嘅「啊嗚啊嗚」、〈彼岸花〉中果句「4分33 we own」或者係shout out前衛作曲家 John Cage 嘅實驗作品〈4:33〉、經常出現類似南簫嘅嶺南民族管樂有點山城藝能組、12月喺 @still.house 舉行嘅pop up store門口果段關於現代人與神話關係嘅文字…..

Damn son,只能夠講係香港hip hop史上嘅instant classic。

深水埗 (Remix)

Novel Fergus & Future

// 歪帽龜一條街逗兩鑊 :Novel Fergus + Future 為紀實說唱深水埗//

依家提起深水埗,唔少人都會諗起早幾個月大南街引起嘅一番爭議,同埋好多人掛喺嘴邊嘅士紳化,雖然應該唔係好多人清楚乜嘢係士紳化,而呢樣亦唔係我哋今日著眼點。事關南昌街以東嘅大南街一帶 —— 即係依家 Storeroom、COTD Coffee、Openground、White Noise Records 嘅地址 —— 嚴格嚟講係屬於「塘尾」,本來係比較辟靜嘅半民居地域,唔係好「深水埗」。咁好「深水埗」嘅深水埗(下稱SSP)係點樣㗎呢?

最iconic,應該係多電器賣嘅鴨寮街、多布行嘅牛棚、多龜嘅警署、多嘢食嘅福榮街,仲有西九龍中心、北河街街市、黃金高登等等,有行開果頭嘅應該會知道呢區總係人頭湧湧,街道衛生程度不理想,街坊年齡層偏高 —— 畢竟呢處係全港貧窮人口比例最高地區,達24.2%,人口密度亦排第三高;與現時大南街青春洋溢境況相映成趣。

然而,如果你想知清楚啲住喺 SSP 嘅有啲咩人,咁就應該係從北河街街市穿埋去荔枝角道以西嘅醫局街、海壇街、通州街,由於果處有美沙酮中心,又由於果處平時少閒雜人等出沒,所以會有不少老同嘅身影;有人講過深水埗有自己一套消化系統,屋企有乜傢俬唔要,除咗可以攞去大南街垃圾站,亦都可以擺喺附近後巷嘅當眼位置(yes,咁做係犯法嘅,but),最快兩三個鐘就已經畀人執咗,尤其係電器,好多都會經維修後出現返喺海壇街果幾間二手電器鋪;而通州街傳統上可以話係非官方嘅露宿者之家,不過近兩年尿壓味淡咗好多,主要都係因為2017年橋底嘅街友被大批驅趕,洗太平地後,再租出去搞下啲cyberpunk藝術展覽乜乜盛。

呢啲人和事不難想像係往日港台會做專題採訪嘅topic,但本地創作者又有冇接觸過此類題材呢?


說唱歌手 Novel Fergus 嘅〈深水埗〉早兩個禮拜推出remix,除咗涉獵呢區地理人口分佈,亦將其中嘅百姓生活描寫出來,將呢首歌畀一個完全唔熟深水埗(但又識廣東話)嘅人聽一次,佢未必會知塘尾果面有一番光鮮,但就會知存在住一班天光墟出沒嘅企街(性工作者),公園賣草hustle嘅南亞裔居民、落場去後巷冚紙皮瞓晏覺嘅餐廳伙記、動刀動槍嘅婆媳紏紛、仲有頭先提過嘅道友/露宿者問題等等(而喺原版中,Fergus 另有提到劏房地價、賭博風氣,不妨聽埋)。


天光墟 低胸企街一堆
多麻甩佬追 平均5 60歲
有南亞裔 問我要唔要貨
公園坐一堆 紅黃黑 陀地拖

今次remix版feature咗另一單位 Geniuz F The FUTURE,據佢自己講,當初係喺IG碌到〈深水埗〉而認識 Fergus,後來再喺朋友慫恿下主動wts合作;自細喺 SSP 長大嘅 Future 形容呢區畀佢嘅印象係「窮、舊、多黃賭毒」,但同時強調 SSP 人情味濃,啲鄰里關係比較close。

Future 嘅rhyme不嬲駕輕就熟,今次尤其中意佢果句「角落中推紙皮陰公 佢自己捱緊嘅貧窮」,其實搬咗嚟呢頭都四年有多,有時見住啲陀背婆仔一手推住大大叠紙皮,另一手就用紅繩拖住百幾舊發泡膠,唔知佢咁樣行咗幾耐,又唔知佢仲要行幾耐。行去幫佢咩?陪佢推條馬路真係幫咗佢咩?住喺呢度,有太多嘢,你想幫都幫唔嚟。

「從日常生活中攞靈感」係一句我哋聽artist講聽到厭嘅說話,但真愛是真,城市風景向來係香港創作者嘅泉源,無論係作家 #董啟章 嘅《V城系列》,#陳果 嘅《細路祥》,甚至大眾最容易接觸到嘅文學作品 —— 廣東流行曲歌詞 —— 一樣留有對呢個地方嘅時代紀錄,柏安妮嘅〈尖東〉、陳奕迅嘅〈黃金時代〉、SHINE 嘅〈東涌日和〉、Serrini 嘅〈油尖旺金毛鈴〉等等(sor真係無聽開如果啲例子太老土請多多包涵),雖然大多係借景講情愛,但當中依然隱藏住香港人聽見先會有feel嘅默契。

有別於原版嘅偷拍式紀實,今次MV製作團隊「東風財運」有心帶大家走一轉 SSP 深度遊,畫面穿插許多你見過又未見過嘅角落:梁添刀廠把大刀、雀館、配匙、唐樓金鋪、南亞、龍威、黑膠阿Paul…..過多五年睇返,可能已經有文物價值。最好唔好啦。

當然,要拍靚畫面絕對可以叫 Fergus 同 Future 去啲地標擺下甫士yo下就算,但導演 Hanley 選擇咗採用「麥高芬(MacGuffin)」方式去講故事:即係指在電影中加入可以推展劇情的物件、人物、或目標。提出呢個概念嘅希治閣本人認為麥高芬係乜其實無乜所謂,另一大導演佐治魯卡斯則認為件麥高芬應該有幾搶眼得幾搶眼,近年《天能》果碌 “Algorithm”,又或者《復仇者聯盟》嘅無限寶石,設計上其實都係麥高芬。

而喺〈深水埗〉MV中,麥高芬就係一粒黑色嘅「一筒」,由完整去到破碎,走過深水埗窿窿罅罅再輾轉去到由 Future 飾演嘅師傅手上,一打一磨修補返。

一筒,一同,一同。都講得好明白。

大難面前無私怨。

文:Milton

Infaceables

Afterglow

感謝 Afterglow 夜媽媽賜我哋一個咁濕潤嘅MV🤤🤤🤤🤤 想睇全套就上人哋 FB 或 Youtube 啦!


相比2018年推出嘅專輯《Different Light》,可以聽見新歌〈Infaceables〉喺運用效果器上tone down不少,冇咁精製,更能聽出每一條肥到標油嘅bassline,加埋啲cowbell同techno beat喺耳仔兩旁左隊右隊,成首歌groovy到咁就真係不能再用「節奏」呀「律動」呀呢啲中文字去形容。

MV剪輯自1979年由美國導演 Abel Ferrara 製作嘅 cult片《Driller Killer》,有血有性有靚衫有party有夾band,故事講述一名紐約生活嘅藝術家因為窮導致壓力大於是中意夜媽媽攞個電鑽出街殺人調劑生活。

當年最廉價俗套嘅cheap thriller,經過「歲月」呢個filter再翻睇又變得活色生香 —— 正如半年前大家覺得唔係好靚唔係好好玩唔係好想去嘅club同livehouse,依家諗返都百般滋味在深喉。

心頭。

Music Written and Produced by Afterglow
Mixing and Mastering by Jay Tse
Cover design by John Wu

搵咗一搵〈Infaceables〉呢個歌名點解,結果只搵到一個喺1984年有少少話題性但又極速收皮,叫做「The Infaceables」嘅膠公仔玩具系列,唔知兩者有冇關聯?

GoldApple

SoWhat

見到 SoWhat 呢首〈GoldApple〉時,下意識諗起希臘神話中一個關於金蘋果嘅故仔,一個貪慕愛情貪到國破家亡嘅故仔。


話說人類英雄 Peleus 喺眾神幫忙下追到(用現代標準嚟講係性侵,but)海洋女神 Thetis 後,宙斯廣派喜帖舉行盛大婚禮,但出於眾多原因,唯獨冇邀請掌管紛爭嘅女神厄莉絲 Eris。唔高興嘅 Eris 於是不請自來,喺主人家檯上放低咗一粒金蘋果後轉身離開,而蘋果上面刻有一段拉丁文:τῇ καλλίστῃ,意思係「獻給最美麗的女神」。

就係咁,好地地一場婚禮就變成選美大會。整個奧林匹克有超過70位女神,經過一輪互相推搪又互相mean9嘅環節後,最後剩低三位佳麗:婚姻女神赫拉、戰爭女神雅典娜,以及愛神阿芙蘿迪蒂(wait,新娘子呢?)。三女立刻牛咁眼望實宙斯,正當全場都以為佢會揀返自己老婆赫拉時,呢位眾神之神將個波一腳交畀人間嘅一位王子 —— 特洛伊王子柏里斯(Paris of Troy)。

故事最後,柏里斯拒絕咗赫拉應許嘅無上權力、雅典娜開價嘅蓋世英雄資格,而選擇將金蘋果贈予愛神,只因後者承諾會幫佢贏得全歐洲最美麗嘅女人:斯巴達皇后 #海倫 嘅愛情。

但呢場人妻NTR卻牽連出一段改變希臘版圖嘅史詩戰爭(Trojan War),金蘋果自此有「不和的根源、發生糾紛的事端」嘅含義。


如果唔係歌名有粒金的話,講起apple大概只會諗起《創世記》嘅禁果,誘惑是最甜美🎶,SoWhat 對作品係如此解話:「我當時想寫低自己對誘惑嘅睇法 —— 貪心/誘惑俾人感覺都係冇咁正面嘅形容,但其實我哋大可以與之並行,唔需要抗拒,又唔好太過陷入,拿掐適中就可以當做動力不斷進步。」

(根據考究,其實所謂禁果可以係指無花果、柑橘、杏桃或石榴甚至葡提子,只不過三世紀末時有神父錯將「知善惡樹」(malum)譯成蘋果樹(mālus),自此禁果被定形為蘋果,但呢啲嘢約定俗成nevermind啦)

〈GoldApple〉MV 由畫面中嘅情侶 Maggie 及 #草津 拍攝剪輯,選擇用 #紅蘋果 以及 #劍球 作為符號,形態上互相對應。前者自然係代表誘惑,而劍球則係兩人均擅長嘅技藝;練習每個劍球招式都必然會經過無數次嘅失敗,而 SoWhat 認為「成功」就係果個令人願意屢敗屢試嘅誘惑(動機),加上情侶甜蜜嘅日常紀錄,表示人喺面對誘惑時一樣可以有好結果。

說唱風格層面,如果你喜愛 #TripleG 或 #DIZI 的話,相信〈GoldApple〉一樣會係你杯茶。

但坦白講,我當初係完全聽唔明呢首歌。例如「勾起你朝慕嘅單純肩掛修美嘅斗篷/反抗著不倒翁/帶住夢深居孤島中/勿任由物質縱容」,又或者「傲慢變得內斂/詼諧由我代言/手法融合誘惑來笑我低下製造笑點」咁,係近年唔少香港rapper典型去脈絡化,碎片化嘅填詞表現。譬如本地 Youtube channel #光頭幫Tomfatki,佢哋首〈ROLLING NOW〉就有一句「Hustle Everyday 走起壯士斷臂」令我印象深刻,因為睇完前文後理都係唔知佢講乜。

可能後者果句只係想人印象深刻,認真我就輸了。

吊詭嘅係,如果你用「誘惑好與壞,在乎你點樣理解」嘅角度去閱讀〈GoldApple〉歌詞,又真係全首都講得通 —— 偏偏喺主旨上,SoWhat 就只提供咗「誘惑是最甜美/成功嘅口感清脆可口」呢兩句線索。雖未至於詞不達意,但的確係有點唔清唔楚?正如 SoWhat 所講,佢想喺婉轉比喻嘅同時又能表達到個意思,呢點確係好考修辭功力。

起碼 SoWhat 用詞零散嘅背後,有一套完整嘅中心思想,並非穿鑿附會言之無物。佢所屬嘅團隊 Yack Studio,知名度較高嘅 Novel Fergus 寫有〈至尊寶〉、〈深水埗〉、〈許願池〉等作品,較著重仔細描述佢嘅觀察或心思,近朱者赤,相信 SoWhat 往後嘅作品係可以更進一步。

空気公団

Dizzi

第一次睇 DIZI 嘅新MV〈空気公団〉時,可能因為漢字歌名,又或者係段日文開場白嘅關係,腦海不停浮現《池袋西口公園》呢套20年前嘅日劇,望住 DIZI 喺香港一啲好似認得但又噏唔出名嘅地方搖擺搖擺,如果唔開聲又唔留意間中駛過果架火車(東鐵)的話,真係會以為自己睇緊日本MV。

近年愈來愈多喺香港本地取景嘅影像作品,尤其係MV,都刻意拍出「唔香港」嘅感覺,呢個「將自己地方裝到唔似自己地方」嘅概念,其實喺亞洲文化中可謂源遠由長。

例如 #細野睛臣 由1975至1978年發行嘅《泰安洋行》及《PARAISO》等專輯,正正係逆向惡搞當時美國人對東洋(oriental / exotic)嘅刻版印象,用日本人身份玩起偽日本人音樂;而泡沫經濟時期嘅日本,啲管理層當正自己係白人等現象亦係講到爛,汽車品牌 Honda 就熱愛用細野老友 #山下達郎 作品做廣告配樂,襯托畫面中許多白人演員嘅優質中產生活,難道你以為淨係白人先識 #whitewashing 嘞喎?

至於好似〈空気公団〉、電影《香港大師》、〈獅子麒麟鳳〉呢類用影像技巧將香港包裝成外地/舊時空/cyberpunk 畫面,除咗係創作者有意發掘主流文化以外嘅香港面貌,亦可能係新生代潛意識不滿香港現狀(物理)嘅表現,某程度上算係禮失求諸野 —— 不過呢「野」往往來得十分超現實。

對將來嘅不安與自省同樣係〈空気公団〉嘅命題,喺兩分鐘時間內,DIZI 吟唱出時下少年迷惘心境,詞走天花龍鳳但並非賣弄玄虛,而係近似《幻愛》咁將日常化腐朽為神奇,誠實地對自我境況作一種詩意詮繹。

就猶如楓葉般嘅漂過佈滿希與冀
像偶遇工業區的你我回憶不過氣
被驅逐後再追逐自己會喘不過氣
來往後走孕育時機再不會失去美
要留守後結集
連結有時從酒/走後建立
去遊走和接納
前設要確信由黑能變白
.
饒舌文法中素愛以 machine gun 去形容 DIZI 呢種一輪咀狂掃嘅說唱方法,但佢個flow聽落從容不迫,恰似一把善良嘅機關槍 —— 歌詞每一句每一字都值得細味,大家開聲自己聽啦 —— 真心係近半年來接觸過嘅粵語rap中,嗒落最有味道嘅其中一首(one of the best if not the best over the past 6 months)。
.
不過上 YouTube 碌一碌,先知〈空気公団〉最早於2018年12月18日已經喺餐廳「談風 vs 説唱」問世,以與 krizzzi 及 #精神少年中心 嘅 Y5 合組 JahnoTown(揸流灘)身份演唱過,soundcloud 上亦早有錄音版本。
.
雖然首歌等到兩年後至拍MV,但意境放到今年聽好似感受更深,世事正如 DIZI 呢句「營營役役重複戰役」,香港不斷面對換湯唔換藥嘅邪惡侵略,城池淊落,幾多少男少女被時代強逼面對世間愁。
.
所以,少年不識愁滋味呢句說話,放喺2020年嘅香港實在脫節得交關,25歲以下嘅香港市民何止識哀愁,直頭知生死。
.
講到年紀,近年同25歲或以下嘅新朋友傾開音樂時,發覺佢哋提到寫歌唔會再講「寫歌」,而係替換成講「做beat」—— 語景轉換,反映以往由結他或鋼琴旋律為創作主導嘅定律已經不再,如今搞掂個 rythmn session 你首歌就有運行。而香港嘅新生代rapper亦逐漸捉到 LMF 等師承 old-school 風格以外,粵語白話文rap嘅新路向:以 YoungQueenz 領銜嘅 Wildstyle 首馬是瞻,去年 Matt Force 首張大碟令樂迷驚覺粵語 hip hop 都可以做出 Oddisee 嗰種書卷氣。

〈空気公団〉based on 製作人 Elijah Who 嘅舊作〈winter coat〉,rapper借beat發揮實乃等閒事,譬如 Eminem 當年將英國女歌手 Dido 嘅〈Thank You〉原首直啪再加beat,寫出代表作〈Stan〉;甚至第一首走上主流嘅饒舌歌曲〈Rapper’s Delight〉都係取樣 Chic 嘅〈Good Time〉;而 Lil Wayne、The Weekend 及 Chance The Rapper 當初都係借 mixtape 令大眾及音樂圈一窺佢哋嘅說唱才華。

幾時都話,做創作最緊要言之有物。
.
Content is king.

707

LK-072

聽住 LK-072 嘅新作〈707〉,第一個想法係:吖,拖咗韓妹 park hye jin 新碟好耐都未寫review。

(大家不妨去扭耳仔睇袁總上個月頭已經寫好嘅詳盡碟評!)

每次聽後者兩張EP時,都好欣賞佢能夠利用亞洲口音嘅英文營造sampling質感,透過以非母語重覆主句嘅方式,於 deep house 風格中玩出 minimal 味道。但呢種用聲畢竟唔係 park hye jin 原創,佢同鄉 Yaeji 亦係玩單音節特性嘅俵俵者,於是又會諗是否「真心話用外語講特別真心」嘅心態作崇,若果換成廣東話處理就會變得好老土肉麻?


但 LK-072 somehow做出格調來 —— 起碼係近期最順耳嘅例子。新歌〈707〉主軸就只得一句「今晚帶你出黎,但我想要嘅唔係你,唔係你」,配合各款節拍音效堆砌,卻係愈聽愈入味。繼玩 city pop、J-rock、trap、vaporwave、Doja Cat 後,今次轉玩粵語 deep house,實在好想聽下佢哋點解畫。

Locka@LK-072:最近好多朋友都問我(喂 Brian),你隻新歌算係咩style?有人話係 UK garage、acid house、techno、deep house……等等。但其實電音我哋唔算好熟,腦入邊都無咩呢類素材,本身目標係想做一隻dark啲嘅boutique歌,於是揀啲vintage鼓機聲,再加啲老套bass聲入去咁。


嗱咁即係我又過份解讀嘞,但「boutique歌」呢個概念幾新鮮,又符合 LK-072 一直以來明愛暗戀嘅MK色彩,而〈707〉正係虛構出一個 MK fuck girl 嘅心理故事(或可對應 MK sad boy?),Locka 如此形容:呢個女仔唔知自己鍾意啲咩,想要啲咩,但又沈溺係控制和利用男性對佢嘅感情,達到某種扭曲嘅滿足感。


而令我哋瞬間將〈707〉聯想到 park hye jin 嘅原因除咗兩者對東方語言嘅運用,亦因為 Locka 冰冷而到肉嘅情慾吐露(尾段嘅雞仔聲屌鬼算係佢哋一貫中意玩落差嘅表現手法)。如果 LK-072 繼續行呢首歌嘅路線,而又如果將來政治環境容許 OC2S 搞返外國show可以再做 park hye jin 嘅香港專場的話,可能我哋會搵 LK-072 嚟做guest都唔定。

但相信貪玩嘅佢哋已經盤算緊下次試咩新嘢。

例如今次新歌其實係 LK-072 同本地服裝品牌「口水橋」嘅合作, Locka 依據對方向來比較厭世病嬌嘅感覺印象,設計出一件 ×°男性嫌悪症Top°°°×,呼應歌中嘅厭男陀地少女角色,另外搭多一條short ver. MV。


講開MV,點解今次visual得一分鐘咁短?

Locka:其實今次係以宣傳片為方向,promo我哋嘅產品同概念。有別於拍攝一個正常mv,太足本反而會覺得悶,想喺觀眾未完全消化之前就煞停。

像極了愛情 🙂

世界末日,有得搵,最好都係搵返你想要果個人啦。

金巴道理農場

金巴利道路真理生命

一場思念性夜間失眠 : 金巴利道路真理生命 新碟搶先聽後感

首先感謝 金巴利道路真理生命 畀我哋預先試聽《金巴道理農場》,由台灣 SEED TOSS 及廣州 琪琪音像|Qiii Snacks Records 聯合實體發行卡式帶專輯,香港樂迷亦可於本週六(7月11日)喺灣仔富德樓發布會現場購買。
.
講返隻碟,試聽時第一個直接反應係以為自己開錯file。
.
因為我認識嘅金巴利道路真理生命(下稱金巴)係混雜的、實驗的;但開首曲〈Nightfall〉聽落十分清涼,完完全全係本地民謠好手 Tomii Chan 嘅聲紋,所以我好肯定自己開錯 file。但係再睇返source,又真係金巴利道路真理生命嚟㗎喎,冇理由喎,點解會玩得咁 folky?再望埋 credit,原來又真係有 Tomii 份。

OK,即係眼前有一個全新嘅生命體,有新人加入,總共由11個人聯合組成。喺多出一倍人參與嘅情況下,佢哋玩出嚟效果反而比變得比以往更加 minimal:

時間上,呢張專輯長度比 EP《金巴利道路真理生命聯合》更短;音色上,一反金巴以往工業噪音嘅印象,亦抽走標誌性嘅電影對白採樣(sampling)以及極度失真嘅vocal﹐取而代之係 Tomii 清涼嘅木結他演奏,與更多留白嘅喘息空間,唯一不改嘅,係傾向 post-rock 嘅結尾方式。

全碟變化起伏不大,仍佛等待著某樣唔會發生嘅事情,一切都喺呢幾十分鐘過程中緣生緣滅,聽到尾先發現自己喺無意識嘅等待中,投入咗自己嘅精神(is that 本真?)。

生命體主要成員 Teeda 形容金巴利道路真理生命係一個 collective,佢可以係空殻的、全有的、可以係全然無機的、亦可以係無處不在的。畢竟佢哋係「道路真理生命」,用樂理分析拆解金巴音樂,就好似用人類道德標準去批判神嘅旨意一樣咁不智,咁徙勞 —— 我哋需要做嘅,係成為一個見證人。

金巴道理農場 | 專輯發佈音樂會
日期 / Date: 11 / 07 / 2020 (SAT)
時間 / Time: 7:30 pm door
場地 / Venue: 富德樓 天台
演出單位 / Groups: 金巴利道路真理生命 及神秘嘉賓s
票價 / Ticket: 200hkd
//
最後,容我嘗試畫面化呢張專輯嘅感覺。

從《金巴道理農場》歌單去睇,可以觀察出一個思緒時序:1. Night Fall,2. Night Fall Interlude,3. Midnight,4. Three Hours,5. Maybe,6.Closure,我哋不妨稱之為「思念性夜間失眠」。

大家有冇試過點都訓唔著,好精神嗰種狀態?你望出窗外感受到夜間嘅地熱,但迎面而來嘅卻係沁涼晚風,摸下床邊空出嘅位,心入面自然湧起零碎未有講出口嘅說話,雜陳嘅感覺就喺字與字之間浮現……冇㗎,囉囉攣,就係仲掛住。

兜兜轉轉,感覺始終係何志武嗰一句:你仲未好返啊?

Mordechai

KHRUANGBIN

你知道嗎?近年已經冇乜後生會跟 Pitchfork 去搵碟聽。除咗因為受壓 Spotify 同 YouTube 超乎強大嘅演算法,亦因為 Pitchfork 當年最出位嘅牙尖咀利,已經逐漸扭曲成品味失格嘅包拗頸,例如德州泰式迷幻號 Khruagbin 上禮拜推出嘅新碟《Mordechai》,佢哋竟然夠膽死畀58分


自從2018年嘅《Con Todo El Mundo》一爆而紅後,Khruangbin 已經係潮到會上《紐約時報》《Vareity》嘅明星樂隊,加上佢哋音樂風格嘅迷幻調性,不期然令我諗起《Lonerism》同《Currents》時期,一腳踩哂主流兩邊岸嘅 Tame Impala。


「旅行」一直係 Khruangbin 鍾情嘅主題,甚至專程開咗個website幫你砌搭飛機時可以聽嘅playlist。佢哋每次演出時,會將自己設定為剛剛降臨地球嘅外來人類(真係㗎,訪問講㗎),對所有民族音樂文化都興致勃勃,遊歷東南亞街巷、探索中東秘境、往加勒比群島取經……借此深化樂隊包羅萬象嘅風格美學。


然而今次新碟靈感嘅飛行里數,比以往要短得多。趁住上年tour空檔,低音結他手 Laura Lee 自己一個去咗行山抖抖氣,途中認識咗一位叫 Mordechai 嘅朋友,相處過程不斷觸動佢回憶自己嘅家庭成長,最後,再喺佢一家大細陪伴下去到一處山林瀑布。而呢張《Mordechai》就係因為咁而由以往嘅大江南北,濃縮為 Lauren 從瀑布一躍而下嘅體會。

概念有變,但新碟依然充滿你所熟悉嘅 Khruangbin 特色:踩住心口律動而上嘅bassline、沉穩但又極富存在感嘅光頭鼓佬groove、以及明明彈得好快好密質質偏偏聽落好鬆馳嘅結他。


而最明顯嘅改變,係樂隊今次編入大量人聲歌唱部分,由 Laura 主導,畢竟今次《Mordechai》係屬於佢嘅故事,從寫畀 Laura 外公嘅〈Dearest Alfred〉中,我哋能夠感受到樂隊由大我回溯小我嘅轉化。

全碟最得我歡心嘅一首〈So We Won’t Forget〉,歌詞同樣流露深刻個人情感,尤其果下「嗚~」,頗有福音合唱(gospel)嘅味道,正好係結他手 Mark Spreer 同鼓佬 Donald “DJ” Johnson 當初相識嘅原點(佢哋以前同 Beyoncé 返同一間教會)。

無論向外闖到幾遠幾闊,最終要探索嘅依然係自己個根。


但係切記一樣嘢,根源並不等如過去,香港早已注定返唔到轉頭,你將要決定嘅係跟隨恐懼嘅節奏過活,還是走上街道,呼喊內心相信嘅旋律。

講到尾,到底乜嘢係旋律?旋律就係勾引你耳朵,思緒不停向前邁進嘅人為聲音設計。

優秀嘅旋律,應該係每一粒音響起時,你都仿佛知道下一粒音會落喺邊度,但最終卻係帶你去到一處偏離想像以外,但似乎更加美好嘅境界。

時代亦如是。


推介曲目 : If There is No Question、Pelota、One to Remember、So We Won’t Forget

Viscerals

PIGS PIGS PIGS PIGS PIGS PIGS PIGS

早兩晚落咗 BOUND by Hillywood,臨走前聽見佢哋播 Black Sabbath 嘅〈Iron Man〉,勾返起想聽重型嘢嘅心癮。

13至15歲時,曾經有段帶住耳機聽 Slipknot、Nirvana、Linkin Park 瞓覺嘅日子,即使後來聽歌嘅範疇變得廣闊,但依然會受 The Black Angels、A Place To Bury Strangers 等比較另類,但依然暴烈嘅樂隊吸引。

享受之餘,亦好奇點解人會需要 / 喜歡呢類具攻擊性嘅聲音。

或者因為現代種種法規下,人想喺文明世界表達憤怒嘅方式實在太少?你試下每日返工前放工後喺條街度等紅綠燈時嗌聲「屌你老母我好憎返工呀」,唔使十日啲街坊已經認定你精神有問題。

但當社會結構失衡,自由崩壞,人民愈來愈難活得似一個人嘅時候,幾萬、幾十萬、幾百萬群眾上街大鬧「狗!狗!狗!」卻變成無人抗拒嘅日常,香港人中意鬧警察做狗(古典啲會鬧做「龜」),而西方世界就中意以豬(pigs)相稱。

Pigs 喺歐美除咗能夠用嚟羞辱警察,又可以指罵資本主義嘅信徒,亦係某類性行為嘅俗稱。來自紐卡素嘅重型樂隊 Pigs Pigs Pigs Pigs Pigs Pigs Pigs(下稱「七級豬」),單係名字已經散發一股強烈嘅反抗意味,風格上偏向 metal 及 punk,亦暗滲不少噪音實驗,雜誌《Louder Sound》形容佢哋為 Black Sabbath 加 Killing Joke 對對碰,都十分精準。

但我每次聽佢哋都會不期然諗起 Motörhead,因為多一浸迷幻藥味。

作為三年內嘅第三張大碟作品《Viscerals》,七級豬更加深化自己一套迷幻暴力美學,但聽見〈Reducer〉及〈World Crust〉兩首單曲時,又感受到樂隊嘗試令呢種暴力更加「友善」,惡得嚟有些少 grunge 味,非常入耳。如果你冇聽開 metal,但個世界又迫到你想開下耳界宣洩一番的話,不妨一試七級豬呢隻新碟:

轟轟聲嘅 bassline 同時具有 stoner rock 及 power metal 力度,主音 Matt Baty 把聲好似隨時想喺耳機衝出嚟,左右開弓摑到你暈,sor,應該係摑到你醒至啱。

就好似臨上場比賽前,教練總會捉大家圍圈圈 pep talk 一輪,香港早已進入戰爭狀態,既然唔想要領袖,就搵一把能夠令自己重燃鬥志嘅聲音。

少年,你想要力量嗎?

推介曲目:Reducer、New Body、Blood and Butter、Halloween Boslon

Miss Anthropocene

GRIMES

電子流行女歌手 / 視覺藝術家 Grimes 日前喜誕麟兒,爸爸 Elon Musk 喺Twitter話小朋友將會命名為「X Æ A-12 Musk」,明顯係致敬媽媽今年新碟嘅其中一首印度風歌曲〈4Æm〉。

連改個bb名都要咁風格化 ———— 老老竇竇,自從2015年隻《Art Angels》後,對 Grimes 嘅認知已經變得類近 Radiohead,佢嘅音樂作品唔再係單純用「好唔好聽」去理解,而係無可避免要跌入拆解隱藏訊息呢個套路。

呢五年間,Claire Boucher 作為 “Grimes” 已經愈來愈明顯想擺脫「人類」呢個身份,創作定位上亦係藝術家多於音樂藝人,仍佛生存於一個名叫「藝術天使禁獵區」嘅異世界。咁呢個presentation當然唔係乜新鮮事,遠有 Sun Ra、Buckethead 同 Slipknot,近有 Arca 同 FKA Twigs,透過非人化嘅角色扮演,的確有助觀眾代入佢哋想表達嘅抽象概念。

《Miss Anthropocene》係 Grimes 嘅第五張專輯,名稱中嘅 “Anthropocene” 係指地質學中嘅「人類世」,泛指人類進入工業世代後,大範圍影響地球原有生態嘅階段,而呢隻碟正係探討地球暖化、人工智能等大議題。但睇多兩篇 Grimes 訪問,又發覺佢放咗唔少自己嘅私密情緒入去,譬如〈So Heavy I Fell Through The Earth〉,其實係描述 Grimes 決心懷孕後,隨之對「母親」呢個角色嘅囚禁感到沈重壓力,不過佢唔講你未必會知首歌係咁解囉。

音樂層面,維持佢嘅 ”ADD Music” 風格,將所有能夠刺激感官嘅元素大包大攬:trance、metal、台灣rapper潘PAN(a.k.a. 貍貓)、cyberpunk、ethereal wave、Lip Peep 嘅死、rave、goth、外星人、極權、女權、witch-house、生物機械、未來主義、John Wick……對於喜歡拆解嘅朋友嚟講,一定愈聽愈有趣。

更佩服嘅係佢中意玩得咁複離之餘,依然可以緊緊捉住流行文化條水。淨係啲MV都已經留得住班fans啦。

你問我哋呢,其實最掛住咪又係2012年喺運動場上彈嚟彈去,唱住〈Oblivion〉果個 chill chiil 漂染大鼻妹,不過唉,人哋冇責任跟你想像條路行㗎嘛。

佢依家係就係中二病美學到極致,但諗得出,實行得到,旁觀者不得𪘲牙聳䚗(依牙松杠)。