聽住 AC/DC 出發,SpaceX 火箭首次射人上太空

剛過去嘅星期六,NASA 首次採用民間製嘅商業用載人火箭,兩位乘客 Bob Behnken 及 Doug Hurley  連同一隻閃令令嘅恐龍公仔,順利抵達國際太空站。


有報導指兩人行去搭火箭時,沿路係聽緊澳洲搖滾皇帝 AC/DC 嘅〈Back in Black〉,咁嘅情節不禁令人諗起舊太空科幻片《Armageddon》入面,用 Aerosmith 首〈I Don’t Wanna Miss A Thing〉做配樂嘅經典畫面……同埋全盛期嘅 Liv Tyler!


每逢 SpaceX 或 NASA 有搞作,都必然直接令大量meme誕生,今次網民嘅普遍主題都係話:你兩個就好啦,可以離開地球行開下。咁又係嘅,2020鑊鑊都迫到埋身,可能真係要行開下行到大氣層,先可以忘記咗呢個世界。


留喺地面繼續崩壞嘅我哋,都係聽返 Luna Is A Bep 啦。