登陸 SXSW 第十年,台灣獨立音樂單位線上延續文化輸出


去年呢個時候,美國嘅 Coachella 同 SXSW 四日內先後公布取消/延期,正式展開全地球演出行業食白果時代。相比前者有 AEG Presents 大水喉資金硬擋,自資嘅 SXSW 面對財困一度傳出破產消息,慶幸周旋過後能夠於今年再度舉辦,將電影放映、音樂演出、講座等招牌活動全部搬到網上舉行。


從樂迷角度,SXSW 未必係一個可以盡情玩嘅音樂節,因為佢查實係一個面向業界嘅交流活動。全名 SXSW Conference & Festival,以德州Austin市為基地,舉行日數接近兩個禮拜,入場觀眾大部分係業界人士,包括全球各大音樂節搞手、文化記者、電影發行商、媒體工作者、幕後技術專才,等等等等。

或者大家可以將佢睇成以前會展同 Expo 成日舉辦嘅博覽會或 Art Basel,每個參展單位都會有自己showcase,只不過展品由電子零件呀珠寶呀換成音樂演出、獨立電影,同樣會舉行各種講座同會議,算係全球最大規模嘅同類型活動之一。


換言之,如果想將自己國家嘅音樂單位推廣予國外業界認識,SXSW 係一個從業者必須涉足嘅港口,而獲邀嘅演出單位如果表現出色,兼有適當人脈資源的話,就可望透過 SXSW 得到將來外地巡迴演出嘅機會。

世界嘅文化軸心正逐漸向東方移動,除咗日本,以及流行文化上表現非常強勢嘅南韓之外,泰國與台灣亦漸漸喺國際舞台上有自己版塊。以 SXSW 為例,後者已經連續十年有代表參加,今年由主辦方從去年入選嘅七個單位中再度邀請 #滅火器 Fire EX.、#鄭宜農 Enno Cheng、#椅子樂團 The Chairs、#妮可醬 NekoJam 參展。演出以預錄方式呈現,而 #文化部 亦與 Young Team Productions 合作策展,把握機會將四個單位與台灣不同實景組合,推廣國家形象。


#滅火器 自2014年為太陽花學運寫下歌曲〈島嶼天光〉後一躍成為國民樂隊,亦有積極計劃自己嘅國際線,譬如去年同日本當地大牌 Asian Kung-Fu Generation 主音 #後藤正文 合作一首〈The Light〉。今次就以工廠景,除咗適合佢哋陽剛嘅搖滾風格,亦可以間接宣傳台灣擁有台積電、鴻海等世界級工業硬實力;另一表演單位 #鄭宜農 則以宜蘭高山平原為舞台,代表台灣音樂版圖上柔軟一面,抒情歌始終係華語音樂一個主要類別,而身為唱作歌手嘅鄭宜農既有人氣,亦有各大音樂與電影獎項加持,新作與排灣族女歌手 #Abao阿爆 合作,融入原住民族元素,體現台灣走向多元發展嘅積極心態。


另外兩組則係新晉單位,其中 #椅子樂團 走復古路線 —— 並非city pop、亦非落日飛車嘅progressive rock,而係似早期 The Kinks、Beach Boys 六十年代小品味道,反而係近年歐美少咗人做嘅風格(霎時諗起只有 Smith Westerns 分支 Whitney),睇留言喺法國 H&M 都會聽到佢哋新歌〈Lemonade〉。演出場地選擇士林釣蝦場,展示台灣平民風貌之餘,又襯托出椅子音樂中嘅休閒生活感。


最後嘅 #妮可醬 講真for我哋自己口味係太偏向EDM,但當見到佢哋安排喺當地宮廟拍攝,成件事又即刻有得嗒。如果去過台南市旅行,必然對當地十步一廟,香火鼎盛嘅畫面印象深刻,而電子音樂亦早被台灣人應用到傳統宗教儀式當中;喺2009年舉行嘅高雄世運會開幕禮上,亦有俗稱「電音三太子」陣頭表演,2017年臺北世大運閉幕時,更以「送神」概念護送聖火熄滅,今次 SXSW 演出就向全球觀眾表現台灣如何結合民間集俗與流行文化。


自2011年起,已經有超過30組台灣樂團/藝人現身 SXSW,睇返台灣策展團隊嘅訪問,係政府官員會主動搵你傾 SXSW,有乜係政府應該出力做,研究國家隊概念……香港的話,呀王英偉(藝發局主席)噏得出 Clockenflap 個名已經係特大驚喜了。

To be fair,2016年起,由香港政府資助嘅 #搶耳音樂 亦有設立 #搶耳全球,矢志「帶團出國」,而本地樂隊 #雞蛋蒸肉餅 亦曾於2017年經西九引薦參加冰島音樂節,另一同行樂隊 #ANWIYCTI 亦自己安排咗一轉歐洲tour。支持本土嘅同時,我哋目光係可以,亦應該望遠好多。

一張照片,一齣電影,一首歌,都可以係國際加深認識一個地方嘅機會。自2019年香港興起 #國際線 一詞,但就音樂文化輸出嚟講,人哋台灣已經早就花十幾年將線行成一條路了;其中文化部甚至專門成立音樂媒體 Taiwan Beats 作對外窗口,成個logistic十分值得香港民間參考,遲啲會有影片同大家深入啲講解。


完整演出可於 SXSW 購買 SXSW pass 觀看。


P.S. 2019年,David Boring 以獨立身份成為史上第一組獲邀於 SXSW 演出之香港樂隊。2020年,本地唱作人 Olivier Cong 受邀參加 SXSW,唯隨活動取消而未能成行。

一個敵人比朋友多嘅星球:Matt Force 新歌背後嘅殺子文化與紀錄

都一個禮拜有多了,大家應該已經睇咗 Wildstyle 同 Clockenflap 合作嘅兩段live session,打頭陣嘅 Matt Force 除咗玩〈告別〉以外,仲正式發表一首新歌〈Hostile Planet〉(嗱嗱嗱,fans實會話佢最先喺七月「TONE」已經玩過一次㗎,但今次係official嘛)。


聽 Matt Force 自不然會先畀歌詞吸引,而第一轉聽〈Hostile Planet〉最有印象嘅係「殺子」呢兩個字。即時諗起嘅係評論界健筆,李怡,於2018年發表一篇名為《「殺子」文化》嘅文章,重提孫隆基關於「殺子」嘅解讀,認為呢個中華文化深層結構,正正係近二百年中國地區長年落後嘅原因;佢嘅論述大概係講中國人自古百行以孝為先,做晚輩嘅無論如何都要孝「順」,就算幾廿歲人血氣方剛一樣要聽教聽話,直至你老了,成為「父輩」換位再撚自己嘅下一代為止。

張藝謀喺《滿城盡帶黃金甲》中有一句對白點出呢套思維嘅精髓:朕不給你不能搶 —— 年輕人想話事,就係搶嘢。呢套嘢自堯舜時代已經run緊,起碼都run咗4100年了,中國社會嘅上一代與下一代永遠處於權力鬥爭之中,一路傳承,逐漸凝聚成 Matt Force 所指嘅敵意(hostile)基因。點解當年《古惑仔》系列咁受歡迎?因為睇住年輕貌美嘅陳浩南上位,爽吖嘛。


(呢篇文寫到一半,就傳來黃之鋒周庭林朗彥承認去年621包圍警總一事嘅相關控罪,或將即時入獄。殺子,對香港人嚟講只會係愈來愈常見嘅壓力,當年李怡篇文最尾都加咗句:梁振英、林鄭,看來得到「殺子」文化的真傳了。真,珍珠都無咁真。)

面對一個無時無刻都恐嚇要放棄年輕人嘅社會結構,又到底該如何自處,Matt 喺詞中表達咗自己嘅睇法:

要根治 就唔只今次
發誓要走上金字塔頂 逼佢跳bungee
往邊個方向走 知道冇得退後
往邊個方向走 知道總要戰鬥

明嘅人自然會明。與沉穩嘅控訴相比,現場版〈Hostile Planet〉可以用典雅嚟形容,展現出九十年代美國東岸boom bap風格以外嘅另一面,Matt 曾經喺IG問答環節講過日本jazzy教父 #Nujabes 對佢有好大影響,亦係 Chris Dave 同 Robert Glasper 等爵士好手嘅fans,今次live session終於可以感受得到佢對器樂演奏嘅想像。追開 Matt IG 嘅朋友都知佢好鬼中意凌晨走嚟開live彈琴,今次終於見到佢現場邊彈邊唱,佢話對自己嚟講算係一個小實驗,睇落又玩得幾輕鬆吖。


不過都要有 R.I.D.D.E.M. 同埋 Room307 托住喺底,出嚟效果先咁ok,其實拍攝當日都有去探班,見住佢哋下晝4點搞到凌晨一點,彈完又彈去攞心目中嘅畫面,事後又要mix又要剪片,都搞咗成個月(@allexchan:mix咗70幾個cut呀),唔輕鬆㗎。

問返 Allex,拍片呢個想法最初係inspired by蒙特婁迷幻樂隊 Parcels 年初嘅《Live Vol. 1》,睇完之後好想拍一條自己覺得靚嘅live片,就撩埋 Matt Force 一齊租 #117A 個studio錄嘢,協商後更得到 Clockenflap 資金support。


Room307 同樣係玩兩首,分別有〈背山望海〉及〈MkSadBoyKowNgDouLuiAsUsual〉,編曲相比錄音版本明顯有野心得多,前者嘅bassline變得十分肥美,lead guitar嘅音色調整得更加濕潤,第二次副歌後爆到尾亦因為有鼓手 Akira (@akira.mimasu.design) 加持,好好力;而後者就直程係第二首歌咁滯,唔介紹,自己聽啦。如果你未現場睇過 Room307,呢條片可以展現出 Room307 係一個much more than bedroom pop嘅青年,呢點相信亦係 Allex 想要紀錄自己嘅初衷之一。

上週六台灣 #金馬獎 完滿結束,香港電影有不錯表現,其中聚焦中國烏坎村起義嘅《迷航》贏得最佳紀錄片。一如影評人所說,我哋正處於一個亂世嘅起步階段,無論係香港抑或全世界,都將會有更多人重視並投入「紀錄片」嘅製作,渴望透過大銀幕又或手機屏幕展示真實畫面(aka:真相)。

2020年,係健康比公民自由更優先嘅一年,整個演出產業都搬咗上網,有 Travis Scott 嘅虛擬實驗,Glastonbury 同 Fuji Rock 等音樂節巨頭亦翻出珍貴舊片嘗試維持熱度,香港則有我哋好佩服嘅 @stayhomekids.tv 不停開機拍攝。我哋並唔相信網上演出能夠取代現場,但喺無辦法嘅情況下,留多啲影像紀錄其實都係值得做嘅事。

落日馬車?Sunset Rollercoaster 新碟聽後感 + 香港場門票重新上架事宜

延期至2021年4月22日嘅落日飛車香港專場,退款後剩返嘅門票依家全部放返上Tickcats重新發售

目前,香港公眾娛樂場所室內活動調整可入場人數到上限嘅75%(但限聚令繼續維持4人,防疫萬歲跳起YEAH),以Musiczone為例,上限600人就即係可以入450人,啲飛按比例賣返貴三成其實都有得做嘅 —— 希望美國大選後會有利好消息,到四月唔需要再煩呢啲肺炎嘢。

至於防疫no.1嘅台灣就連濕身音樂節都搞過幾輪了,當地本土音樂文化市場亦因鎖國而座大,眼見樂迷對金音獎嘅投入程度,竟然係令人諗起二千年頭曾經叱咤嘅 #叱咤;樂手們亦把握演出真空期潛心創作,譬落日飛車就喺上週五推出第三張大碟《SOFT STORM 柔性風暴》。


一如九月底舉行嘅《颱風騎士》台北專場預示,再次以「風」及「馬」為主視覺,唱片封面嘅颱風藏有烈馬形相,配上金屬美工字型,頗有七十年代前衛搖滾味道,與經典樂隊Camel嘅純演奏大碟《The Snow Goose》有點點相似。


然而音樂調性上則係歷來最soft嘅一次,新碟延續《Villa Vanilla》情詩格局,喜歡飛車深情浪漫一面的話,相信會寧舍中意。

譬如〈Under The Skin〉旋律上呼應 Bee Gees 首〈How Deep Is Your Love〉,先行單曲〈Candlelight〉有韓團 Hyukoh 主腦 #吳赫 獻聲,另一首〈Passerby〉亦請到菲律賓R&B製作人 Michael Seyer,兩者聲底均與國國相近,有種分靈體合唱嘅奇妙默契。


上年邀請飛車來港時,已經期待現場會有新歌聽,今次算係得償所願吧。

【買醉容易,買品味難】太子 BOUND 重開playlist放送

林鄭政府上月中終於進一步放寬so called防疫措施,包括酒吧在內嘅場所可以重開,營業至晚上十二時,灰姑娘就最開心啦。

咁耐冇去飲嘢,開齋梗係要揀間好少少。落bar除咗睇地段、menu同格局之外,播啲咩歌其實都好影響果晚心情,尤其是對於耳仔敏感嘅樂迷嚟講,如果鋪頭揀嘅playlist難聽/唔啱聽,真係坐唔得耐。


音樂係能夠構成店家性格嘅重要一環,譬如東京嘅 Bloody Angle 主打60至70年代嘅二線soul funk音樂,成為好此道者嘅解渴聖地;而喺唱機及音響仍然係奢侈品嘅1920年代,日本甚至有一種名為「名曲喫茶」嘅咖啡廳模式,嚴禁客人交談,只容許靜靜地聽古典樂 —— 如今僅餘涉谷道玄坂嘅 LION,以及高円寺嘅 NELKEN 健在。


喺香港,以音樂品味(唔係音樂演出)為賣點嘅酒吧絕無僅有,想飲嘢時聽見傳統主流音樂以外嘅BGM,参考圈內人嘅足跡不失為好法子。要數近五年來箇中代表,自然會諗起佐敦山林道嘅 Hillywood,以及後來轉戰太子界限街嘅 BOUND

My Little Airport 翻唱 LMF 嘅〈今宵多珍重〉時,喺YouTube落嘅相頭就係 BOUND 門面;酒吧禁令實施前,成隊 WildStyle 亦會選擇喺 BOUND 同 Triple G 過生日;除咗係 indie/hip hop 仔女嘅蒲點,其實唔少本地演出搞手都愛帶artist落去消遣,包括 Cigarette After Sex、La Femme、Christopher Owens (Girls)、BO NINGEN、Higher Brothers 都曾經係座上客。


一個大家都咁捧場嘅地方,鋪頭選播嘅音樂必然唔會失禮,禮拜五 BOUND 同客人久別重逢,唔知佢哋當時想播咩歌呢?

兩位老闆 Nathan 同阿周各有心水,前者話會由 DJ ONRA 播到 Frank Zappa(見圖),後者索性整咗個 playlist 同大家分享。

嗌交啫,唔使用劍嘅:FKA Twigs 新MV倫敦比武相愛相殺

你有冇試過因為好愛好愛一個人,所以嬲起上嚟想殺死嗰個人?你有嘅。


FKA Twigs 上個月重發2019年單曲〈sad day〉,一首適合喺2020年任何一日聽嘅歌。今次特製 MV 搵嚟曾為 Childish Gambino 執導〈This Is America〉嘅日裔 Hiro Murai 合作,拍攝一對倫敦男女相愛相殺嘅故事 —— gimmick位在於呢兩位唔耍花槍,而係耍卧虎藏龍式嘅中國劍舞。

追開 FKA Twigs 嘅,或者會以為佢舞劍係單純嘅排舞演練,但其實 Tahliah Debrett Barnett 喺2017年從子宮肌瘤症狀康復後,就開始跟一位定居洛杉磯嘅 #胡師傅 習武,主要係學套路。

今次佢應用喺MV拍攝上,導演亦相當考究,無論係吊威也嘅輕功motion、用劍尖挑水、兵器撞擊聲效、連從背後掹出寶劍等細節都甚有港式武術片功架。有情人飛簷走壁,喺西方城市夜景襯托下,詩意至極。

臨尾突變成 body-horror 去表達穿心之痛 ,配合返愛情係互相傷害嘅主題,竟然又講得通。

講到中國武打元素融入歐美MV,唔靠 Google 第一時間諗起嘅始終係 Chem Bros 喺2003年推出嘅〈Get Yourself High〉,當時導演 Joseph Kahn 將由 #羅莽 主演嘅邵氏舊片《少林與武當》加以後製,用上當時未成熟嘅CG技術,剪輯出一段音響大戰,啲人又帶耳機心口又掛boombox又乜乜盛,今日再睇依然爆腦又爽皮。


但〈sad day〉嘅愛情主題又令人諗起 M.Ward 嘅〈Chinese Translation〉,用上cutie水墨畫卡通,去詮繹大文豪 #托爾斯泰 一則關於「三大難題」嘅寓言。


其實 FKA 個MV睇到尾都唔係好聽得清〈sad day〉首歌係點,不過佢嘅表現方式向來都係遊走好聽與好睇之間,唔講咁多,去片。

【多謝大麻】傳奇地下俱樂部XXX班底希雲街重聚,六手聯打online DJ set

見到大麻淨係諗起smoke呀hash呀犯法呀的話,代表該人對呢種草本藥物嘅認識只停留娛樂層面(which is fine),忽略咗佢強大嘅醫學功用及經濟效益。

而當 Netflix 都拍紀錄片介紹 LSD 及菇等致幻藥物(Yo La Tengo 配樂!),連台灣議會都開始審視應否修改相關法例嘅今時今日,若果仍然稱呼大麻為「毒品」的話……真係同中國政府會比較啱傾。睇多兩篇美國/加拿大合法化嘅新聞,都會知大麻嘅好處實在太多,多到有「買賣大麻就是公民抗命」嘅說法。

望返香港,起碼大麻成份之一:大麻二酚(CBD),係列為合法藥物。相信過去兩年凡有接觸次文化嘅朋友都好大機會聽過,接觸過,甚或係日常用家。隨住大麻合法化成為西方共識,坊間愈來愈多 CBD 類產品,最近連 JOYCE 都開始做推廣了(人哋係結束上市,唔係結業呀)。

唔少產品都以口服為方向 —— 正如1995年連載嘅漫畫《中華一番》所示,大麻自古以來都係食得落肚的 —— 其中就包括今年一月推出,一嘢賣曬2000樽嘅「Oh CBD Beer」大麻製啤酒。飲酒係好多香港人閒時放鬆下嘅手段,依家有埋抗焦慮、消炎、調整內分泌等效果,就更加係飲得杯落。

按廠方說法,甚至有飲完第二朝唔會hangover嘅「副作用」。

Oh CBD Beer 暫有三款,分為酒精濃度較低嘅 session IPA (3.5%) 以及一般 IPA (6.5%),每支含有20mg嘅CBD成份,目前只限網上購買。


好,話曬 OC2S 都係音樂文化媒體,點解一輪咀講咁多大麻呢?事關八月廿二號禮拜六晚上11點,Oh CBD Beer 聯同大麻蜂蜜品牌 The Honey Collective 3.9 以及 #白T仔,喺銅鑼灣服裝店搞現場搞咗個線上 DJ set 娛賓。但真正令我哋興奮嘅係演出陣容:Enso + Tedman Lee + Yao ,呢三個名一字排開,不禁令人想念起本地傳奇俱樂部 XXX 嘅美好時光……

夏夜晚風有妳,就是我還在等待的愛:Layton Wu 雷頓狗簽約落日飛車自家廠牌

以1994年經典電影《愛情萬歲》剪輯成MV,由台灣製作人 Layton Wu 翻唱伍佰嘅〈夏夜晚風〉算係今年第一季最驚艷,聲畫配合出不受時空限制嘅懷舊愁緒,似足 cyborg 流派嘅新浪潮復古美學。


但隨住影片因版權問題而遭 YouTube 刪除,定居芝加哥嘅 Layton 亦淡出樂迷視線,直至近日,〈夏夜晚風〉又喺 IG story 再度吹送。


原來 Layton Wu 正式與落日飛車創立嘅唱片公司「夕陽音樂」簽約,除咗預告發行首張mixtape《Summertime》,喺IG公開紀錄短片,亦將〈夏夜晚風〉上架 Spotify 及 Apple Music 等平台(之前只有得喺 bandcamp 同 soundcloud 聽)。


自從台劇《想見你》出街後,不少當地年輕人重新認識伍伯的好,繼而出現大量翻唱作品,包括 Deca Joins、徐佳瑩、八三夭、韋禮安 等等,但依然係 Layton Wu 呢首最襟聽。既捕捉到原曲嘅深情,又能夠將伍佰嘅man9肉緊轉化為softboi式溫柔,幾個簡單嘅progression就牽引出愉悅心情,落日飛車果然慧眼識新丁。


而兩者之間亦有些許淵緣:跟開飛車嘅舞台大佬 Fred(我哋早兩個post有提過)同時係 9m88 嘅 production manager,而 Layton Wu 就係 9m88 首〈愛情雨〉嘅編曲兼製作人 —— 話說 9m88 御用低音結他手 LINION 亦係上緊位嘅台灣唱作新人,曾經贏得金音獎之餘,上月尾推出嘅大碟《Leisurely》有 #陳嫺靜 及 #雷擎 助拳,主打 R&B / neo soul 風格。


至於 Layton Wu 涉獵嘅音樂元素則更加廣泛:爵士、hip hop、funk、老搖滾、blue-eyed soul、lo-fi 等等都係順手拈來,加上佢優秀嘅編寫觸覺,相信放埋去 Summer Salt、Jakob Ogawa、Triathlon、Mellow Fellow 等 lo-fi / bedroom pop 代表同台會幾good fit。

如果想進一步認識呢位飛車back嘅新面孔的話,不妨去佢嘅 #街聲 profile發掘下,總之見到朱茵撳入去聽曬佢做果堆remix就啱㗎喇。

以後唔只兩秒貨仔!講下 Netflix 新片頭,又講下 Pornhub 片頭

有謂發財立品,Netflix 自從奠定影視streaming龍頭地位後,就全力追求各大影視獎項,但屢屢受「影片需於戲院上映最少xx週」此類條件限制,而各大院線又同 Netflix 喺傳統上畫 #空窗期 傾唔掂數。

隨住愈來愈多自家作品,Netflix索性以收購戲院方式解決問題(有錢就是任性)。繼紐約嘅巴黎戲院後,佢哋於五月再下一城,買下荷里活百年地標 #格勞曼埃及劇院(Grauman’s Egyptian Theatre)。而為咗配合戲院觀眾群嘅習慣,Netflix 前日就公開咗專為戲院而設嘅延長片頭音效。


佢哋請來曾為 #馬田史高西斯 及 Christopher Nolan 交貨嘅 Hans Zimmer 出手,寫出16秒全新版本,亂纏嘅交響曲式弦樂營造出亢奮上揚氣勢,而招牌嘅”ta-dum”兩聲亦變調成深沉嘅休止符。講真16秒玩得啲乜吖,大家聽下就知,大師今次純粹滿足返 Netflix 嘅功能性需求,老老實實喺大銀幕用返原本果兩秒音效會更有性格 —— 不過商業用途就無所謂啦。

Netflix 單news咁就講完,但想搭單講埋另一個更深入民心嘅電影開場音效 —— 無錯,就係鹹網 Pornhub 嘅〈community intro〉。


有睇開 PH 嘅朋友都知唔係每段影片都會出現呢個 drum & bass 音效,而係只有與 PH 合作頻道嘅影片先會採用,但有咁多素人同片廠撐場,真係除非你係 #ThisAV 死忠否則都好難話冇聽過~

相信 PH 就冇打算再做一條戲院版,但該音效於2019年開始有人喺 Tik Tok 玩過一輪,今年二月再有一條喺 Instagram viral咗嘅短片,拍低一位美國中學生喺才藝表演以真鼓真情演繹〈community intro〉,掀起全場哄動,該學生跟手畀人退埋學(後來記過了事)。

PH 媒體部門發言人 Chris Jackson 亦深明呢個網絡現象嘅宣傳效益,表示非常歡迎大家攞個beat嚟玩,於是又出現數首以此為基調嘅 hip hop 小品,我哋揀咗以下一首唔錯嘅畀大家聽聽。


亦有網民指〈community intro〉係取經自著名加洲樂隊 TOTO 一首叫〈Rosanna〉嘅舊歌,又真係有九成九相似。

如果再扯遠我哋可以回顧一下各大片廠及電視台嘅片頭/過場動畫配樂典故,又或者香港廣告歌(jingle)集體回憶,不過星期日都係不了,想專心放假。

你還愛國嗎:中宣部解封李志,或參演九月東海音樂節

(編:如果你成日聽見李志個名,但又唔係好識佢乜水,睇news之餘亦可以當呢篇係一個超短篇入門)

中國網上最近流傳一段影片,內容為大陸男歌手 李志 於8月8號成都「三缺一」巡演上嘅一段演出,唱出〈熱河〉、〈天空之城〉等歌曲,台下觀眾亦熱烈和應同跟住歌唱。


之前我哋果篇《少年你太天真了》都有扼要講述李志上年初疑因 #六四事件 30周年而憑空消失嘅前因後果,但原來自6月27日起,有關李志復出的話題已開始出現於微博,其微博帳號及其歌曲音樂頻道亦逐一解封。

李志,中國獨立音樂人、民謠歌手,其音樂帶有對抗平庸嘅理想主義,唱出面對大時代嘅落魄感,成為唔少so called社會異端、文藝青年嘅精神符號。李志對於當下中國社會、中共體制嘅反諷同批判,更於〈人民不需要自由〉、〈廣場〉、〈1990年的春天〉等歌曲,及演出現場裡體現(例如佢喺2017跨年演出朗誦咗詩人北島嘅《回答》,該詩於1976年中國天安門「四五運動」期間創作)。


由於頻密接觸「敏感」政治題材,中國政府遂以「行為不端」此莫須有罪名對李志進行咗為時十八個月嘅全面封殺,以致「李志」二字曾一度於中國全網消失。

喺上述成都演出後,最近就有傳佢會於九月嘅東海音樂節演出(海報見到封咗一半、印有「南京」嘅字眼,相信係隱喻李志嘅另一稱號「南京市民李先生」)(「封咗一半」呢個狀態諗真啲都幾有玩味),不過陣容公布不久即有大量網民熱心舉報,現時演出機會未明。

李志嘅復出對於樂迷同歌手本人及團隊固然係好事,不過以後要踩鋼線咁創作,就係對一個藝術家內心非常大嘅挑戰,消息傳出後亦有人戲言李志今次復出係咪傾掂數要喺台上唱紅歌。


查實李姓市民吊威也踩鋼線都踩咗咁多年,依家應該形容佢下半生要踩住條頭髮嚟行先fair —— 究竟共產黨統治下嘅藝術何時才有自由?我哋暫時仍然未望見 the end of the road。

「人民不需要自由,這是最好的年代。」
– 李志,2006

對於疑惑點解中國可以喺疫情下搞音樂節嘅朋友,就一定係冇睇四日前 Louis Vuitton 喺上海搞果場大龍鳳嘞。信國家不怕呀,又或者你可以信武漢肺炎真係同流感level差不多~

Billie Eilish 賣睡裙推廣新歌〈my future〉

「我嘅未來會係點?」呢個問題日日有人自問自答,但問返年頭嘅 Billie Eilish,相信佢就點都估唔到自己會係同大家一樣被疫情困守家中。

2020年1月26日,呢位現年18歲嘅美國唱作少女成為 #格林美獎 61年來,第一位同屆橫掃四個主要獎項嘅女藝人,仲順手成為 James Bond 系列電影主題曲史上最年輕嘅獻唱者。


個頭開得咁靚,Billie仔本身計劃好包含香港場嘅大型世界巡迴演出,以及新碟嘅錄音計劃,結果全部隨住 #武漢肺炎 一聲bye bye煙消雲散,半年內唯一「作品」就只有原定為演唱會製作,一條以女性身體自主為主題,對抗 #bodyshaming 風氣嘅概念短片。

直至上週四,Billie Eilish 終於推出美國進入自主隔離(Quarantine)狀態後嘅第一首新歌〈my future〉,繼續以電子 R&B 為主軸,但比起大碟時期更傾重爵士樂元素,而無論鋪墊嘅ambient音源,抑或 Billie 嘅唱腔,喺mixing上都有些少 #ASMR 感覺。


而考慮到全球年輕人當下都係留喺屋企多過出街,Billie 今次推出嘅主題商品亦唔再係tee,而係一件”sleep tee”, 不難想像一班迷妹們搞 sleepover party 會著嚟開IG live🤤


動畫MV交由澳洲動畫師 Andrew Onorato 製作,佢曾經與 Childish Gambino 合作,相信對非常欣賞後者嘅 Billie Eilish 嚟講係加分位。化身動畫少女嘅 Billie,從一場大雨中憂鬱踱步,反覆唱起對將來嘅期望,被fans問到對「未來」嘅想法時,Billie仔係咁回答:The future feels uncertain and crazy right now…… I have to keep reminding myself that the future is ours.

而動畫尾段雨過天晴花開富貴,被大家定型為厭世少女嘅 Billie 其實向來有積極一面 —— 講真,唔積極點樣上位上得咁快呀?你估真係純商業操作咩😅


番返去一開始條問題,就呢一刻嚟講,面對亂世,住台灣嘅會樂觀啲,住香港嘅會悲觀啲;而我哋望住 Billie Eilish,只擔心佢會否係地球上最後一個流行文化icon。