從金音獎2020贏家參透 台灣類型學 vs 香港類型學 優劣

從香港人角度去介紹台灣嘅音樂頒獎禮,其實都幾好寫:因為單純就音樂頒獎禮文化嚟講,台灣有嘅嘢即係香港冇嘅嘢,變相隨便一點攞出嚟都係切入點。

譬如從獎項分類就已經見到兩地分野,㩒入金音創作創作獎官網,會見到 #不分類型獎項 及 #類型音樂獎項 兩個欄目,呢度指嘅類型係音樂風格:搖滾、民謠、嘻哈、電音、爵士、R&B、另類流行,與香港淨係會有咩男歌手女歌手組合金曲金獎之類相比,著眼點明顯不同;喺香港就算係出名分豬肉,獎項數目一度多到有163個嘅新城勁爆頒獎禮,分類型嘅方式都只停留喺廣告歌曲、卡啦OK歌曲、合唱歌曲……咁樣。

兩地差異,除咗因為香港所謂四大頒獎禮都偏向係商業活動,客觀性欠奉;亦因為評審團體/機制缺乏專業性,就攞頭兩類「搖滾」同「民謠」嚟講,三個電台一個電視台入面,邊個有足夠公信力去評審?會唔會揀得出 #傷心欲絕?客觀現實就係香港嘅頒獎禮從來都冇重視過流行曲以外嘅香港音樂。

民謠類兩個獎項嘅得主巧合又未必係巧合地均以原住民語言演唱。今屆金音 #最佳民謠專輯 《戇仔船》由 #米莎Misa 與東京中央線樂團樂手大竹研、早川徹、福島紀明合作,苗栗長大嘅佢唱四縣腔客語,即係客家話嘅其中一條分支,曾經講過「以華語創作難以表現自身獨有的情感」。

其實同樣mindset早喺1994年嘅浸大AC Hall已經出現過: #我採用依一種語言 #只係希望你地明白多一點點 #明白多一點 —— 但呢首〈究竟應該點〉當年有冇喺任何頒獎禮被提及過?

至於贏得 #最佳民謠歌曲 嘅 #葛西瓦 ,喺當地最出位嘅往績應該係2018年於另一頒獎禮上以排灣族母語rap出一首〈台灣早就有嘻哈〉。今次攞獎呢首〈好好走〉依然係饒舌作品,令人可以體會到民謠嘅現代性,而且feature同族嘅 #瑪斯卡 ,將族人嘅生死觀都寫埋入去;當 #民族意識 喺香港仍處於萌芽階段時,有需要參考台灣文化如何作多樣性發展 —— 尤其我哋時間無多。

生死同樣係 #最佳嘻哈專輯《像我們這樣的騙子》命題之一,#張伍 嘅作品有種邪釘嘅cult味,唔會係市場上最易入口果批,而睇返佢喺 Spotify、YouTube、KKBox 嘅播放數字的確不算出眾。呢點正正係金音改由主席組成評審團嘅優點,平衡利益衝突,理論上完全從音樂創作層面出發,有利於發掘同一類型下其他風格面向嘅優秀作品,對海外觀眾嚟講能做到「哦,原來台灣有呢啲」嘅驚艷效果。對香港觀眾嚟講,多數會好奇點解兩個R&B類型大獎都唔係由 9m88 或 ØZI 贏呢?咁就會令你更想知道以三個獎項成為今年金音最大贏家嘅 J.Sheon 到底是何許人也。

調返轉嚟講,金音亦會逆向令台灣本地觀眾接觸到更多海外嘅音樂單位,例如入圍 #最佳另類流行專輯獎 嘅香港歌手 #SOPHY王嘉儀

最後想提提電音類型,今年分別由 #Ń7ä 以及 #SoniaCalico(Go Chic)贏得最佳專輯及歌曲獎,聽住前者嘅〈Maroon〉時,不期然諗起香港嘅 Kelvin T、ASJ,甚至澳門嘅 AChun —— 非舞曲類嘅電音生意向來都唔好做,但就算未有市場關注,都起碼應該有來自業界嘅認可 —— 台灣就透過金音獎做到了。

對於追捧本地音樂生態嘅樂迷嚟講,或者佢哋最終都係希望自己心水單位入圍又或者得獎,但喺具一定權威性嘅評審結果下,能夠引導樂迷思考每個得獎者嘅過人之處,從而達至對音樂更深入嘅理解方式。一個地方嘅音樂場境,尤其獨立音樂場景要健康成長,一群注重質素嘅open mind就係最肥沃嘅土壤。

一個敵人比朋友多嘅星球:Matt Force 新歌背後嘅殺子文化與紀錄

都一個禮拜有多了,大家應該已經睇咗 Wildstyle 同 Clockenflap 合作嘅兩段live session,打頭陣嘅 Matt Force 除咗玩〈告別〉以外,仲正式發表一首新歌〈Hostile Planet〉(嗱嗱嗱,fans實會話佢最先喺七月「TONE」已經玩過一次㗎,但今次係official嘛)。


聽 Matt Force 自不然會先畀歌詞吸引,而第一轉聽〈Hostile Planet〉最有印象嘅係「殺子」呢兩個字。即時諗起嘅係評論界健筆,李怡,於2018年發表一篇名為《「殺子」文化》嘅文章,重提孫隆基關於「殺子」嘅解讀,認為呢個中華文化深層結構,正正係近二百年中國地區長年落後嘅原因;佢嘅論述大概係講中國人自古百行以孝為先,做晚輩嘅無論如何都要孝「順」,就算幾廿歲人血氣方剛一樣要聽教聽話,直至你老了,成為「父輩」換位再撚自己嘅下一代為止。

張藝謀喺《滿城盡帶黃金甲》中有一句對白點出呢套思維嘅精髓:朕不給你不能搶 —— 年輕人想話事,就係搶嘢。呢套嘢自堯舜時代已經run緊,起碼都run咗4100年了,中國社會嘅上一代與下一代永遠處於權力鬥爭之中,一路傳承,逐漸凝聚成 Matt Force 所指嘅敵意(hostile)基因。點解當年《古惑仔》系列咁受歡迎?因為睇住年輕貌美嘅陳浩南上位,爽吖嘛。


(呢篇文寫到一半,就傳來黃之鋒周庭林朗彥承認去年621包圍警總一事嘅相關控罪,或將即時入獄。殺子,對香港人嚟講只會係愈來愈常見嘅壓力,當年李怡篇文最尾都加咗句:梁振英、林鄭,看來得到「殺子」文化的真傳了。真,珍珠都無咁真。)

面對一個無時無刻都恐嚇要放棄年輕人嘅社會結構,又到底該如何自處,Matt 喺詞中表達咗自己嘅睇法:

要根治 就唔只今次
發誓要走上金字塔頂 逼佢跳bungee
往邊個方向走 知道冇得退後
往邊個方向走 知道總要戰鬥

明嘅人自然會明。與沉穩嘅控訴相比,現場版〈Hostile Planet〉可以用典雅嚟形容,展現出九十年代美國東岸boom bap風格以外嘅另一面,Matt 曾經喺IG問答環節講過日本jazzy教父 #Nujabes 對佢有好大影響,亦係 Chris Dave 同 Robert Glasper 等爵士好手嘅fans,今次live session終於可以感受得到佢對器樂演奏嘅想像。追開 Matt IG 嘅朋友都知佢好鬼中意凌晨走嚟開live彈琴,今次終於見到佢現場邊彈邊唱,佢話對自己嚟講算係一個小實驗,睇落又玩得幾輕鬆吖。


不過都要有 R.I.D.D.E.M. 同埋 Room307 托住喺底,出嚟效果先咁ok,其實拍攝當日都有去探班,見住佢哋下晝4點搞到凌晨一點,彈完又彈去攞心目中嘅畫面,事後又要mix又要剪片,都搞咗成個月(@allexchan:mix咗70幾個cut呀),唔輕鬆㗎。

問返 Allex,拍片呢個想法最初係inspired by蒙特婁迷幻樂隊 Parcels 年初嘅《Live Vol. 1》,睇完之後好想拍一條自己覺得靚嘅live片,就撩埋 Matt Force 一齊租 #117A 個studio錄嘢,協商後更得到 Clockenflap 資金support。


Room307 同樣係玩兩首,分別有〈背山望海〉及〈MkSadBoyKowNgDouLuiAsUsual〉,編曲相比錄音版本明顯有野心得多,前者嘅bassline變得十分肥美,lead guitar嘅音色調整得更加濕潤,第二次副歌後爆到尾亦因為有鼓手 Akira (@akira.mimasu.design) 加持,好好力;而後者就直程係第二首歌咁滯,唔介紹,自己聽啦。如果你未現場睇過 Room307,呢條片可以展現出 Room307 係一個much more than bedroom pop嘅青年,呢點相信亦係 Allex 想要紀錄自己嘅初衷之一。

上週六台灣 #金馬獎 完滿結束,香港電影有不錯表現,其中聚焦中國烏坎村起義嘅《迷航》贏得最佳紀錄片。一如影評人所說,我哋正處於一個亂世嘅起步階段,無論係香港抑或全世界,都將會有更多人重視並投入「紀錄片」嘅製作,渴望透過大銀幕又或手機屏幕展示真實畫面(aka:真相)。

2020年,係健康比公民自由更優先嘅一年,整個演出產業都搬咗上網,有 Travis Scott 嘅虛擬實驗,Glastonbury 同 Fuji Rock 等音樂節巨頭亦翻出珍貴舊片嘗試維持熱度,香港則有我哋好佩服嘅 @stayhomekids.tv 不停開機拍攝。我哋並唔相信網上演出能夠取代現場,但喺無辦法嘅情況下,留多啲影像紀錄其實都係值得做嘅事。

台灣金音獎2020入圍單位嚟講呢,呢六個我哋特別想喺香港睇

下個禮拜就十二月喇,無論對各行各業世界抑或個人嚟講,都係例牌做總結嘅時間,而音樂層面嚟講,即係各大小頒獎禮舉行嘅日子。

自從林峯喺所謂樂壇橫空出世又消失後,香港人好似對頒獎禮已經無感覺咗好多年,此不關乎本地出產嘅音樂質素,而係大家都唔再覺得「獎」呢樣嘢有認售性,就好似果啲勳章呀乜乜盛咁,who cares。反而對國外果啲都仲會有反應,例如 Grammy,又例如韓國嘅Mnet亞洲音樂大獎


對岸嘅台灣亦有一個名稱相近嘅亞洲音樂大賞,源自第九屆金音創作獎起向國外擴充嘅轉型計劃,金音獎英文全寫為 Golden Indie Music Awards,睇名就知定位與流行音樂獎項有別,文案中亦講明係側重音樂創作本質,睇返2010年起嘅得獎及入選名單亦明顯具前瞻性。不同於香港現狀,一般普羅大眾/商業機構仍視獎項為指標,想入門搵indie嘢聽時自然會從入圍名單著手,頒獎禮對一個產業嚟講有其獨特價值。

武漢肺炎繼續嚇怕幾十億嘅未感染人口,但全球防疫no.1嘅台灣雖然因為技術問題無法進行海外演出(隔離措施衍生嘅海外藝人住宿成本,感染風險等等),各類型境內演出卻幾近全面回復正常,繼續每日零感染。身為演出搞手嘅 OC2S 當然對明年全球嘅演出業運作抱樂觀態度,亦有一直update心水對像,咁除咗我哋自己會搞嘅落日飛車(咁啱國國同張洪泰嘅《龍港 LONGONE》得到今年金音評審特別賞)之外,都喺度推薦返幾個搞到就最好,搞唔到都想喺香港睇到嘅2020金音入圍單位:

1. 蛋堡 Soft Lipa 

基本上任何時候見到蛋堡個名都會即刻幻想佢玩某幾十首歌嘅現場畫面,damn,如果老師夠力玩場四個鐘嘅live的話,我都絕對可以唔使揸水一口氣睇曬。回想2016年喺香港開始多人聽 Nujabes 時,隔個海嘅蛋堡已經係做jazzy做咗七年有多,無論係編曲sample定係玩rhyme(hit the rhyme! 找出最簡單的方法🎶)都愈玩愈有,即使拍埋 Shing02 呢啲日本大神級rapper都完全夠秤。

當年作為傳奇廠牌「顏社」嘅開國元老,帶 Leo王 及 李英宏 等人出身,到做埋老竇變咗 Soft Lipapa,杜振熙依然keep到果份幽默火氣,今年告別顏社後自資發表新碟《家常音樂》即刻入圍金音最佳專輯獎,就算題材係叫囡囡「小蛋花」第時要proud of自己有個rapper爸爸(跟你同學說 這裡饒舌特別多 這是我們家的家常音樂),父愛爆棚得嚟都可以不帶一絲老氣,任性不減當年。坦白講香港觀眾似乎咁多年來都唔係特別buy蛋堡,真係好可惜,希望有機會幫佢做多啲推廣。


2. YELLOW 


每次見到英俊又玩音樂嘅光頭男子,都不免會諗起《NANA》入面嘅阿泰,所以第一眼見到 YELLOW 主腦黃宣時,以為係玩傳統啲嘅band sound嘢。殊不知一開聲就發覺soul funk到不得了,直程帶些少二千年頭 Jamiroquai 果類嘢嘅感覺。黃宣本身係台灣圈內頗有名氣嘅製作人,曾與 9m88 等對象合作,行到幕前唔只入選最佳新人(團)獎,野獸派嘅性感台風更入圍埋最佳現場演出獎

華語音樂圈好少有呢種chok出嚟唔假嘅騷靈味,喺獨立樂團中更加少見,而呢個程度嘅演奏dynamic齋靠耳機/屋企喇叭一定無法如實表現,我哋敢寫包單係睇live比聽Spotify更精彩,睇騷唔係個個都識un,但睇 YELLOW 你一定會睇到一半兩邊望下,睇下係咪個個觀眾都好似自己聽得咁入神。


3. 美秀集團 Bisiugroup AmazingShow


老老竇竇,今年金音入圍名單中最想睇就真係美秀集團,淨係睇主音狗柏舞佢果支自製小鋼炮「台八線」都已經值回票價,難怪以《美秀集團《八寶山》演唱會》入圍最佳現場演出獎。查實上年 Detuned Radio Festival 已經請咗佢哋嚟 TTN 玩,但因為果日見攰就無睇到,諗返真係蠢過隻豬,明明美秀live係咁提神醒胃!想了解佢哋係咩風格咩形象嘅可以從〈我要你愛〉MV入手,浮誇到荒謬嘅台客搖滾舞曲,可謂同鄉前輩伍佰嘅特濃版本,喺呢個失常年代實在特別啱心水(今年見到有人將首歌剪埋《亞基拉》畫面,夾到不得了),一句「我要你為了我變壞」就已經把我攻佔 :3 

P.S. 查資料先知佢哋攞過「香港亞太青年樂隊大賽」亞軍,奇怪的知識今天又增加了.jpg


4. 熱寫生 Heat Sketch

民謠喺香港仿佛總係一件這麼遠那麼近嘅事,或者因為呢處係一個有城無鄉嘅地方?就算有都係黑色嘅……入圍今年金音最佳新人(團)獎熱寫生起先由阮眯及曾立組成,走民謠風格,後來變得愈來愈多樣化。無論係聽處女大碟《豆皮少年》抑或聽佢哋喺玉成戲院錄嘅live session,最搶耳必然係三支結他嘅交流,兩位創團成員主要以riff或單音做底,而新加入嘅主結他手張盛文(透明雜誌)總可以喺溫暖氛圍中撩出一抽刺激腦皮嘅彈奏,但喺〈青元春朗〉呢種慢版歌又會有點到即止嘅和諧表現。熱寫生IG經常post團員食嘢,而佢哋嘅歌詞亦穿插住不少食物嘅描寫,如果有機會請嚟香港,一定要帶佢哋去食好西。


5. LINION


金音獎嘅「最佳現場演出獎」有一個幾有趣嘅安排,就係會喺正式頒獎禮前,安排入選單位喺亞洲音樂大賞嘅「FEAST展演」同場battle,另外再有嘉賓加持,而其中一員就係與 YELLOW 同年入選「大團誕生」嘅 LINION。起先以「9m88 御用低音結他手」身份引起注意,雖然推出個人單曲〈Room 335〉後不時被樂迷與同樣走軟性柔情路線,因翻唱〈夏夜晚風〉而爆紅嘅 Layton Wu 作比較,但 LINION 憑住更純粹嘅R&B風格已經漸漸走出一條都會男孩路線,值得期許。

6. イルカポリス海豚刑警


除咗展演,由金音獎派生出來嘅「GIMA練團室」名單亦係發掘台灣時興樂隊/唱作人嘅好地方,今年就有我哋私心喜愛嘅 #海豚刑警,來自台南,一首〈安平之光》已經聽得出佢哋十分討人歡喜嘅任性氣質,尤其係表情多多嘅主音 #楊淑芬,彈起結他上嚟有種說不出嘅狠勁,想睇。推介海豚刑警,主要係覺得大家值得喺呢個唔開心嘅環境下開心一下。


寫呢篇推介文最大感受係每個單位嘅live片都非常易搵,而且大部分都有返咁上下view count,證明業界有心紀錄發展之餘觀眾亦樂於積極回應,咁講絕對無眨低香港個scene嘅意思畢竟 OC2S is also a part of it ———— 但真係好羨慕台灣人逐步逐步建立到一個行內行外都享受嘅大環境。

無痛失戀冷知識補完計劃:音樂類

同一套戲隔咗十年再入戲院睇,完來真係可以get到完全唔一樣嘅感覺。

翻譯歐美電影戲名嚟講,舊時香港肯定係華文世界做得最好嘅地區,高手們往往因應電影內容而運用意譯技巧,無論係文藝片《Lolita 一樹梨花壓海棠》、科幻片《Alien 異形》、甚至笑片《Road Trip 四仔旅行團》都有過許多經典作。其中又包括2004年上映,由 #占基利 與 #琦溫絲莉主演嘅《Eternal Sunshine of The Spotless Mind 無痛失戀》,如果按鄰近地區咁直譯為「美麗心靈的永恆陽光」,票房或者會比當年遜於預期嘅表現更差……

話說,每隔幾年歐美就會出現一套反映/影響當代人愛情觀念嘅經典電影,譬如2018年嘅《Call Me By Your Name 以你的名字呼喚我》就宣示文明社會已經進入一個愛情唔再需要分男女主角嘅年代,而2009年嘅《500 Days of Summer 戀夏五百日》則引起一整代年輕人討論到底係 Tom 傻仔還是 Summer 善變,最後明白愛情從來只有講timing而無分對錯。但如果你問起一班三字頭嘅戲迷,邊套愛情電影最經典的話,相信唔少人都會回答《無痛失戀》。

失戀痛起上嚟,唔少人都會浮現「寧願當初無識過呢個人」嘅念頭,而《無痛》就係base on呢個假設去發揮。Charlie Kauffman 天馬行空得嚟刻劃人心嘅劇本,加上法國鬼才大導 Michel Gondry 運用大量道具嘅獨門拍攝手法,築構出一段科幻得嚟又令人有切膚之痛嘅忘情之旅。畫面以外,由 Beck 翻唱 The Korgis 嘅〈Everybody’s Got to Learn Sometime〉亦成為唔少樂迷長放iPod嘅金曲。


至於由 Jon Brion 製作嘅配樂則相當受行內人好評,簡單弦樂編排,加上西班牙結他與鋼琴點綴,就能詮繹出心碎、著迷、懸疑、焦慮、困惑、純真、童年創傷、希冀、懷愐等等各種比劇本更複雜嘅情緒 —— 如今再攞隻soundtrack出嚟聽,Jon Brion 真係可以做到每一首都牽引出你一種情緒嘅效果,愈聽愈回味。


攞其中一幕做例子:喺手術進行途中,飾演診所護士嘅 Kirsten Dunst 讀出戲名來源嘅詩篇《Eloisa to Abelard》向醫生示愛,而意識清醒嘅 Joe 就身處與 Celemintine 嘅美好經歷之中,直至呢段記憶被儀器清除,Clementine 消失為止(實際上係劇組逗留紐約期間,撞正一年一度俗稱 “Elephant Walk” 嘅世界級玲玲馬戲團巡遊,導演 Gondry 即興拉隊拍成嘅魔幻場面)。短短26秒嘅結他與琴音纏綿再分裂,足以點出情侶分手後對甜蜜往事嘅思念與唏噓。


當年未上神枱嘅 Kanye West 喺睇完《無痛》後深受衝擊,於是透過所屬廠牌 Def Dam 大佬 Rick Rubin 引薦,邀請 Jon Brion 喺第二張個人大碟《Late Registration》合作,據 Jon 訪問所講,佢哋第一次見面就寫好〈Gold Digger〉嘅雛形;而往後 Jon 率領住一組二十人嘅管弦樂團,按 Kanye 要求提供相應嘅材料,再全程參與編曲工作。

如果細心聆聽的話,不難發現整張《Late Registration》帶有室內樂(chamber pop)色彩,喺十五年前嘅hip hop世界中算係相當稀有嘅質感 —— 雖然 Kanye 今時今日已經畀人當半個傻佬咁看待(mental health has always been a serious topic),但不能否定佢早期野獸式嘅音樂直覺,夠膽揀一個完全唔熟hip hop嘅人做幕後,鑄造出一張影響hip hop界最少五年嘅里程碑大碟。

仿佛係要強調《無痛》對當時新碟嘅影響,Kanye 甚至邀請導演 Michel Gondry 喺其中一首〈Diamonds From Sierra Leone〉中擔任鼓手:大家都知佢係拍MV出身,但喺與 Bjork、Radiohead、Daft Punk、The White Stripes 等大明星合作前,Gondry 起初就係幫自己嘅樂隊 Oui Oui 揸鼓棍。


Gondry 往往會將自己嘅音樂品味滲入電影之中,眼利嘅朋友大概會記得喺 Joe 進行睹物思人療程時,畫面攝入實驗藍調歌手 Tom Waits 嘅名盤《Rain Dogs》。

Jon Brion 此後繼續配樂工作之餘,都有keep住與其他rapper共事,包括以製作人身份完成 Mac Miller 今年推出嘅遺作《Circles》,後者早於2012年已經喺mixtape《Macademic》上sample過《無痛》嘅soundtrack,另外,Memoryhouse、Jay Electronica、XXYYXX、Four Visions 等單位亦有喺各自早期歌曲中引用 Jon Brion 手筆。


《無痛》最近喺香港戲院重新上映,入場仲送英文原版海報,如果未睇過嘅真係要想辦法買張飛入場傷心傷心,反省反省。

睇得明 Michel Gondry 呢個廿幾年前嘅MV,就會睇得明《TEИƎT》

睇得明就天能,睇唔明就低能?

人類進入武漢肺炎時代後,首套全球上映嘅荷里活大片《TENET 天能》終於喺香港揭幕,Christopher Nolan 同 #華納 嘅堅持總算捱到出頭天。導演向來以扭橋見稱,今次新戲玩盡佢最偏愛嘅時空理論,有人形容為一個畫面內同時進行緊兩套戲,又有人講笑話套戲叫《TENET》係因為你要入場睇十次(TEN-ИƎT)先會明。


實際買飛睇完又覺得冇咁誇張,如果你睇戲係睇故仔唔係睇細節的話,《TENET》唔算一套特別難理解嘅科幻諜報電影(spy-fi?)。反而 Nolan 今次嘅動作場面設計真係幾考人眼力,如果驚自己睇唔明的話,不妨重溫法蘭西名導 Michel Gondry 喺1996年拍落嘅一個MV,睇下自己對「時間逆行」畫面有冇過敏反應。


〈Sugar Water〉由左右兩個split screen組成,Cibo Matto 兩位成員 #羽鳥美保 及 #本田ゆか 分別以順時序動作,以及逆時序出發,喺中段一場車禍後兩人交換左右位置,再返回各自嘅起點。吊詭嘅係個MV無論順住播同倒轉播時,情節動作都會係一模一樣,某程度上同《TENET》異曲同工,尤其係 Gondry 以紅藍去區分角色,巧合地fit返《TENET》最後果場大戰嘅某樣安排。

番返去睇唔睇得明《TENET》嘅迷思:如果你答得出〈Sugar Water〉到底用咗幾多部攝影機,而又總共用咗幾多分鐘嘅footage的話,咁你就可以放心入場喇。提示:Cibo Matto 有喺訪問提過最後喺玻璃上寫字果一幕最考功夫,重拍咗10次以上先至寫啱方向同次序。


電影喺全球開畫兩星期後,大多數外國網民反而係諗起嘻哈名團 The Pharcyde 嘅經典MV〈Drop〉。導演 Spike Jonze 無好似 Gondry 咁玩順流逆流,單純由頭rewind到尾,但全隊 The Pharcyde 都要學識反轉跳舞同夾嘴形,執行上比起〈Sugar Water〉高難度得多 —— 可想而知,入戲院淨係睇《TENET》啲動作場面都抵。

加上瑞典樂手 Ludwig Göransson 今次為《TENET》編寫嘅配樂壓迫感一流,既能增強動作場面嘅魄力,亦彌補到 Nolan 今次捕捉情感較為失色嘅缺憾,要喺戲院聽先至原汁原味。

識搵一定係搵葉劉:資深音樂搞手求助求出小風波 + 趣味大麻音樂分享

「出250蚊show錢/車馬費嘅老闆,係咁上下質素」
.
前日 #葉劉淑儀 出咗個命題【自由音樂人大吐苦水】嘅post,話資深本地演出活動品牌 The Underground 主理人 Chris B 積極聯絡,代表深受疫情嚴重打擊嘅音樂演出業求助,呢兩晚成為不少圈內人茶餘飯後嘅話題。一方面有人表示係咪要搞返個「Chris B 不代表我」嘅受害者群組,指出葉劉你都搵得不如直接搵北京仲實際;另一方面就有人話……well,其實暫時未見到有另一面嘅聲音。

葉劉喺文中稱呼 Chris B 以及同行嘅 Neil 為「業界代表」亦係今次嘅爆點之一,但某程度上係講得通的。事關 Chris B 確實喺過去幾個月不停叫圈內人做網上問卷向政府部門反映,其中不少都有入去擺低自己嘅意見同觀察,只不過當時冇人知道自己嘅想法最終會係攞畀葉劉等一眾親北京派(pro-Beijing)人仕過目。

喺立法會完全失去為民間議政嘅功能,而政權又每日諗盡法子大大力錫住香港人嘅年代,向呢兩方人馬求助擺明係無用之舉,只會被對方影張相集郵當功績。亦反映我哋呢一行嘅現況係幾咁絕望。鄰近嘅台灣及泰國喺本地演出活動上已經全面回復正常,人人有show睇,人人有工開;但喺昨日傳出嘅港府放寬措施中,依然完全排除音樂演出嘅可能性,只係開放場地予練習之用。

但都公道講返句,Chris B 當初係有向多個政府官員、行政會議成員以及立法會議員send email的,而為民間紓困本來就係呢班人嘅份內事,只不過呢度係香港咁解啫。但除咗葉劉接見,就僅有梁耀忠及鄭松泰等廖廖數人回覆 The Underground;而葉劉嘅最終建議竟然係搵「收入豐厚」嘅香港作曲家及作詞家協會(CASH)援助,果然係一場唔知頭唔知路嘅對話。
.
(借位宣傳:其實諸如 TONE、Eaton 同 Stay Home Kids 等單位一直有籌辦線上演出嘗試維持工作及生計,唔想見到呢一行繼續零收入手停口停嘅你,請用買飛課金等方式實質援助,冇你支持,我哋最終只能死)

呢批花生炒完攤咗兩日其實已經腍腍地,成件事最有趣嘅部分,反而係意外地流傳返 Chris B 所屬樂隊 MBAF 早年一首〈Y.M.T.〉嘅MV,冇錯,就係 #靚仔你有冇大麻#我問你有冇大麻#過嚟啦快啲啦我想同你食大麻#我唔係鬼妹我想同你傾計#我好high呀 果首。

依家再聽返,見住一班洋人玩返自己個stereotype,惡趣味得嚟無傷大雅,而且條bassline肥到爆十分啱聽。
.
單嘢大家睇完得個知字就算喇,因為乜都無改變過。

手機裡的戰爭:TikTok 收皮前瞻 + 點解IG新功能香港冇得用?

(編:今日係2020年8月31日,要記得嘅,始終都會記得。呢篇基本上係學術文,關於音樂產業生態多於音樂本身,內容九淺一深,想了解下 TikTok 會點收皮嘅不妨睇落去)
.
當 Kevin Mayer —— 迪士尼前執行長喺五月跳槽上任 #TikTok CEO 時,全世界都預料國際版抖音會成功漂白,喺西方尤其係美國市場得寸進尺。上星期五,做夠100日 CEO 嘅 Mayer 宣布離任。

大家都知 #迪士尼 近十年就好似 #Thanos 咁想收購哂電影世界嘅所有大寶石,而包括 Marvel、Pixar、Lucasfilm、21st Century Fox 等交易,都係由 Mayer 負責談判及主導,後來更一手提攜人見人愛嘅 Baby Yoda,令 Disney+ 成功入到屋 —— 論功績論權勢,都可以話係迪士尼嘅第二把交椅,亦因此一直被行內行外認為會係董事長/行政總裁 Bob Iger 嘅接班人。

所以當今年二月 Iger 欽點另一高層 Bob Chapek 接棒時,成條華爾街都跌哂眼鏡;至於 Mayer 同 TikTok 嘅戀情快嚟快去,則算係意料之內,原因當然係 TikTok 最近一個月畀白宮㩒住嚟砌,難怪 Mayer 急急腳跳船。
.
隨住中美關係持續緊張,TikTok 呢個紅底app本來就有安全漏洞爭議,用家個人資料及數據數度被外洩到中國政府,去到國家安全層面,狂人總統 Donald Trump 索性勒令 TikTok 母公司 —— 中國科技巨頭「字節跳動 ByteDance」—— 要喺10月30日前出售美國業務予美國本土企業,並需刪除境外儲存嘅所有美國用戶資料,否則全面封殺,目前有 Microsoft 及 Walmart 積極投標。
.
無論最終花落誰家,抑或北京唔想拆畀人睇自己個app嘅backend有幾得人驚而斬倉,甚至過完美國大選能夠神奇翻身都好,TikTok 嘅熱度相信都會告一段落,事關 Facebook 已經將過往應付 Snapchat 冒起嘅招數用喺 TikTok 身上:抄橋。
.
喺 Trump 發布相關行政命令嘅前一日(5/8),FB 旗下軟件 Instagram 正式推出全新功能”Reels”,完完全全就係抖音嘅翻版:一樣係畀用戶自己揀歌再錄影,而且能夠以 video post 形式保存喺個人頁面。係繼”Story”及”IG TV”後又一大改動。
.
眾所週知,Zuckerberg 五年前為咗令 Facebook 進軍中國市場,多番取悅習近平,去到邀請習總幫自己個bb改名嘅地步,惟最終無法如願。朱伯格自此改變親中立場,例如佢係近日美國國會會議嘅數名科技巨頭代表之中,唯一公開承認中國政府有竊取美國公司嘅知識財產。今次利用 IG 配合白宮夾擊 TikTok,未必係純粹商業與政治考慮。

但呢啲鬥爭其實都唔太影響我哋,喺 TikTok 七月撤出香港前其實都只係得最多15萬用戶,而”Reels”功能亦不開放香港地區:因為 Instagram 嘅 music library 從來都只係適用於部分歐美國家。
.
無 music library 做支持,TikTok 當初就完全唔成立,更無可能喺半年唔夠就跑贏 IG 每日使用次數/每次使用時間。TikTok 之能夠以過江龍身份取得各大唱片公司版權,其實係因為佢嘅玩法非常適合煲起特定歌曲,尤其係 lip sync/dance challenge/react & duet 等功能利於以超低成本將指定歌曲散播。例如 Drake 嘅〈Toosie Slide〉就借 #dancechallenge 空降排行榜第一位,而 Doja Cat 首〈Say So〉亦係另一受惠者。

基於發行商、唱片公司、以至版權條例嘅限制,部分地區確係難以建立音樂存庫,但講到尾都係錢可以解決嘅問題。換句話說,IG 並不睇好香港用戶對音樂文化嘅投入程度,唱片公司亦基於近似原因,而將牌照費(license)開天殺價(因為無marketing value)。
.
反觀日本,既係北京選擇作 TikTok 第一個試業嘅海外國家,而且已經有大量用戶積極投入”Reels”市場,包括 #坂野友美 等知名藝人,而日本人有幾重視音樂則無需多講。咁冇得玩”Reels”其實就好小事嘅,不過可以側面反映香港市場畀業界嘅印象咁解。

舉多一個更易理解嘅例子。點解香港區嘅 Netflix 戲種/數目都咁少?因為一套戲/劇嘅發行商會就住唔同地區嘅市場需求,開出唔同價位賣 license 俾 Netflix;更多時候係不同地區會有個別發行商買入作品版權,再轉售不同串流平台(如果某套戲香港係無發行商認頭,咁就唔使諗會有得睇了)。
.
每逢 Netflix 喺一個地區開放多一套戲,就要俾多一筆牌照費,所以每項交易都會考慮購入 license 到底划唔划算,公司 deal 唔 deal 到好嘅價。無論 Instagram 定 Netflix,呢類完全以內容(content)主導嘅公司非常睇重市場調查,盡可能掌握各地嘅觀眾口味,”Reels”選擇跳過香港市場,大概係歐美音樂/喺香港受眾太少,好難喺度複製 Doja Cat 或 Drake 嘅宣傳策略。
.
當然,亦不排除朱伯格跟隨白宮判斷,視一國一制下嘅香港等同中國,自然唔會㗰心機深入敵陣。

8.24 Mamba Day:回顧傳奇球星 Kobe Bryant 超短暫rapper生涯

今日係2020年8月24日,籃球迷之間嘅非官方「Kobe Day」,事關喺傳奇球星 Kobe Bryant 二十年嘅 NBA 生涯中,曾先後穿著8號及24號球衣。

無論你係咪籃球迷,喺今年1月26日都會睇到呢位一代籃球巨星,被譽為史上最接近 Michael Jordan 嘅男人嘅死訊。當日早上消息傳出後轟動全球,被列為 #武漢肺炎#澳洲環島山火 級數嘅年度大事件。

當晚舉行嘅 #格林美 音樂頒獎禮因而蒙上陰霾,轉變成第一個悼念 Kobe 嘅公開場合,而典禮會址又恰好係 Kobe 奉獻咗20年手青春嘅 #洛杉磯湖人 主場 — Staples Center 體育館。其實 Kobe 同音樂嘅連結遠早於此:佢曾經同 Sony 唱片簽約,推出個自己嘅饒舌單曲。

Kobe 喺1996年進入 NBA,當佢喺1998年首度入選全明星時,正值美國嘻哈文化嘅第二個高峰期,Jay Z、Public Enemy、Outkast、Lauryn Hill、Black Star 等單位都於該年交出代表作;大概係出於純商業判斷,Sony 喺1999年同Kobe簽下一紙唱片嘅合約。


佢先喺歌手 Brian McKnight 嘅〈Hold Me〉初試啼聲,及後再喺隊友 O’Neal 嘅〈3X’s Dope〉容串,最終於2000年推出單曲〈K.O.B.E.〉,請來當年人氣超模 Tyra Banks 合唱(無錯,就係 American Next Top Model 個 Tyra Banks)。


老老竇竇,首歌個beat就十分罐頭,Kobe 嘅flow雖然算扎實但亦好普通,歌詞直程可以用老土嚟形容:What I live for? Basketball, beats and broads —— 唯一highlight係尾段佢用意大利文嚟rap(佢12歲前都係意大利生活)。


當年樂評人普遍唔賣帳,最mean嘅有呢句:this is more off-target than those three airballs he threw in 1997 against the Utah Jazz(喺 Kobe 嘅第一次季後賽中佢一出場就連炒四個air)。由於風評太差,大碟計劃喺MV都拍埋嘅情況下,由監製 LL Cool J 決定斬倉止蝕。雖然音樂夢碎,但對 Kobe 嚟講,呢場小小嘅rapper之旅意義在於佢喺拍攝MV時遇見自己嘅一生所愛:後來結埋婚嘅 Vanessa Bryant。


Kobe 自此無再踏足過音樂圈,喺丹佛性侵醜聞後更係專心打波 —— 直至2011年應 #雪碧 邀請同周杰倫合作,幫佢首乜鬼〈天地一鬥 Spark〉噏幾句 yes of course ,MV出鏡喺街場撚下周董咁 —— 成件事極之老尷,首歌質素差劣,MV更係一大浸唔夠budget嘅土豪味,仲衰過 Kobe 廿年前嘅失敗作。


再跟住果季 Kobe 就斷埋阿基里斯腱,從此打唔返以前水準;2016年留下一句”Mamba Out.”,手戴五隻冠軍戒指結束傳奇職業生涯;2018年贏得奧斯卡動畫短片獎項;2020年1月26日,與女兒 Gianna Bryant 於前往訓練途中,因直升機墜毀而死。


對 Kobe 迷嚟講,呢位運動員最吸引人嘅地方並唔係佢爐火純青嘅球技,而係佢唔服輸,不停催迫自己進步嘅奮鬥精神。呢種被 Kobe 命名為 #MambaMentality 嘅信念影響力相當大,據統計,有超過500首 hip hop 作品name drop過呢位球星,包括 Travis Scott、M.I.A.、Beyoncé、Kayne West、Rick Ross、Lil B、Ghostface Killah、Lil Wayne、J.Cole……


昨日係 Kobe Bryant 嘅42歲冥壽(我不能接受.jpg),佢生前所屬嘅運動品牌 Nike 發布咗一條名為《Better Mamba Forever》,由 Kendrick Lamar 聲音導航嘅紀念短片。


喺簡潔嘅鋼琴鋪墊上,Lamar 細數我哋每個人能夠做得更好嘅事,就好似 Kobe 要求佢嘅每一個隊友、朋友、家人、球迷、年輕人咁樣:你唔一定會成為最好,但你必需要為咗成為最好,去變得更好。

Better friend. Better fighter. Better rider. Better eater. Better leader. Better generation. Better nation. Just be better. Can you do that?

Kendrick Lamar, Better | Mamba Forever, 2020
#MambaForever

以後唔只兩秒貨仔!講下 Netflix 新片頭,又講下 Pornhub 片頭

有謂發財立品,Netflix 自從奠定影視streaming龍頭地位後,就全力追求各大影視獎項,但屢屢受「影片需於戲院上映最少xx週」此類條件限制,而各大院線又同 Netflix 喺傳統上畫 #空窗期 傾唔掂數。

隨住愈來愈多自家作品,Netflix索性以收購戲院方式解決問題(有錢就是任性)。繼紐約嘅巴黎戲院後,佢哋於五月再下一城,買下荷里活百年地標 #格勞曼埃及劇院(Grauman’s Egyptian Theatre)。而為咗配合戲院觀眾群嘅習慣,Netflix 前日就公開咗專為戲院而設嘅延長片頭音效。


佢哋請來曾為 #馬田史高西斯 及 Christopher Nolan 交貨嘅 Hans Zimmer 出手,寫出16秒全新版本,亂纏嘅交響曲式弦樂營造出亢奮上揚氣勢,而招牌嘅”ta-dum”兩聲亦變調成深沉嘅休止符。講真16秒玩得啲乜吖,大家聽下就知,大師今次純粹滿足返 Netflix 嘅功能性需求,老老實實喺大銀幕用返原本果兩秒音效會更有性格 —— 不過商業用途就無所謂啦。

Netflix 單news咁就講完,但想搭單講埋另一個更深入民心嘅電影開場音效 —— 無錯,就係鹹網 Pornhub 嘅〈community intro〉。


有睇開 PH 嘅朋友都知唔係每段影片都會出現呢個 drum & bass 音效,而係只有與 PH 合作頻道嘅影片先會採用,但有咁多素人同片廠撐場,真係除非你係 #ThisAV 死忠否則都好難話冇聽過~

相信 PH 就冇打算再做一條戲院版,但該音效於2019年開始有人喺 Tik Tok 玩過一輪,今年二月再有一條喺 Instagram viral咗嘅短片,拍低一位美國中學生喺才藝表演以真鼓真情演繹〈community intro〉,掀起全場哄動,該學生跟手畀人退埋學(後來記過了事)。

PH 媒體部門發言人 Chris Jackson 亦深明呢個網絡現象嘅宣傳效益,表示非常歡迎大家攞個beat嚟玩,於是又出現數首以此為基調嘅 hip hop 小品,我哋揀咗以下一首唔錯嘅畀大家聽聽。


亦有網民指〈community intro〉係取經自著名加洲樂隊 TOTO 一首叫〈Rosanna〉嘅舊歌,又真係有九成九相似。

如果再扯遠我哋可以回顧一下各大片廠及電視台嘅片頭/過場動畫配樂典故,又或者香港廣告歌(jingle)集體回憶,不過星期日都係不了,想專心放假。

我可能因此而無法再去中國了:周庭被捕,日本音樂人聲援整合

香港眾志前副秘書長 #周庭 因涉嫌違反 #港區國安法 被捕一事,除咗喺香港引起掀然大波,亦有不少日本音樂人相繼表示關注。
.
熱衷於日本文化嘅周庭自學日文經年,於國際媒體平台 Twitter、Youtube 等一向以日文出帖,亦會於其 Youtube 頻道談論有關日本嘅政治及社會議題,喺日本方面維持國際關注有相當影響。

自周庭於8月11日被捕後,先有 #水曜日のカンパネラ(Wednesday Campanella)成員 KOM_I 聲援及響應 #FreeAgnes 網上行動,另一創作歌手 #春ねむり(Haru Nemuri)亦有發帖表達對獨裁政府嘅憤怒,揚言要對極權舉中指(佢去年曾響應爆眼少女 #EyeForHK 行動,不時於 Twitter 發文表示 #StandWithHongKong)。

12日早上,樂隊 Luna Sea 及 X Japan 結他手 #Sugizo 於 Twitter 為周庭被捕一事而發聲:「實在不能保持沉默,這是侵犯人權,追求自由的行動並不是犯罪。」發文一方面得到日本國內不少網民及海外樂迷支持,另一方面卻惹來中國網民反對,令 Luna Sea 嘅數位音源全數下架,其官方帳號亦被逼於中午刪除兩篇帖文。

七尾旅人 – Free
https://note.com/tavito/n/nbc4f7b47364c
//
日本創作歌手 #七尾旅人 為周庭創作名為〈Free〉嘅新曲,歌曲封面為香港去年嘅街頭抗爭畫面,反覆唱道「Free Agnes」。歌曲筆記中,七尾旅人分享去年到中國演出時感受到當地國民嘅溫暖,同時感受到獨裁國家嘅壓力,並憶述自己曾因歌詞審查而被中國當局拒絕入境,因而完全明白公開表態支持香港嘅後果。
.
「我可能因此而無法再去中國了,或許再也見不到那裡的朋友。雖然很痛苦,但這就是我的抗議。」
.
被釋放後嘅周庭接受日本傳媒訪問,提及自己被拘留時,不時諗起著名女團 #欅坂46 名曲〈不協和音〉嘅歌詞。

我絕不說Yes,不會點頭
就算周圍的人都是這樣,我不會說Yes
絕對不會保持沈默
我會持續抵抗到最後的最後
.
有日本網民指出,將秋元康嘅歌詞放到香港嘅情況後,「字裡行間嘅意思便產生出不一樣嘅重量」。再次證明音樂可以跨國境、語言咁為唔同人帶嚟力量。
.
其實日本各界一路緊貼香港反送中運動,既有日本民眾舉行嘅聲援及文宣,日本國際媒體 NHK 於運動一年來嘅在地採訪,更有日本電視台日本テレビ團隊為 #721元朗襲擊事件 製作專題報導。而日本跨黨派議員聯盟於昨晚發表聲明,抗議周庭等人被捕,並要求日本政府保護在日本的港人。

日本嘅音樂發展向來為港人稱羨,不論主流或獨立單位都持續有突破有進步,縱然喺世界上嘅影響力近年被韓國掩蓋,但「日本音樂」呢塊金漆招牌始終愈省愈靚。
.
創作需要健全嘅土壤,如果一個地方呢樣唔準講,嗰樣唔畀唱,ABCDEFG 七個音符有兩個唔用得 —— 唔係話有制肘就冇藝術,但藝術嘅本質就係衝擊框架,囉。
.
因此眼見發生喺香港嘅種種殘暴及不公義,同樣為東方文化大國,受惠於民主政制帶來嘅自由(to certain extent)嘅日本人會為香港發聲,先係正常文明社會嘅反應。
.
On the other hand,今日開始有中國網民傳出一張持槍女子嘅圖片,指係周庭執行秘密任務時嘅照片,並嚴正讉責;但唔使半秒就被拆穿係特攝《幪面超人01》嘅劇照,圖中人物實為女演員 #井桁弘惠 。

資料來源: M-OSH CLUB 宇宙電波 UNIPA 喜愛日本 Like Japan
.
文字:Angela
編輯:Milton