從金音獎2020贏家參透 台灣類型學 vs 香港類型學 優劣

從香港人角度去介紹台灣嘅音樂頒獎禮,其實都幾好寫:因為單純就音樂頒獎禮文化嚟講,台灣有嘅嘢即係香港冇嘅嘢,變相隨便一點攞出嚟都係切入點。

譬如從獎項分類就已經見到兩地分野,㩒入金音創作創作獎官網,會見到 #不分類型獎項 及 #類型音樂獎項 兩個欄目,呢度指嘅類型係音樂風格:搖滾、民謠、嘻哈、電音、爵士、R&B、另類流行,與香港淨係會有咩男歌手女歌手組合金曲金獎之類相比,著眼點明顯不同;喺香港就算係出名分豬肉,獎項數目一度多到有163個嘅新城勁爆頒獎禮,分類型嘅方式都只停留喺廣告歌曲、卡啦OK歌曲、合唱歌曲……咁樣。

兩地差異,除咗因為香港所謂四大頒獎禮都偏向係商業活動,客觀性欠奉;亦因為評審團體/機制缺乏專業性,就攞頭兩類「搖滾」同「民謠」嚟講,三個電台一個電視台入面,邊個有足夠公信力去評審?會唔會揀得出 #傷心欲絕?客觀現實就係香港嘅頒獎禮從來都冇重視過流行曲以外嘅香港音樂。

民謠類兩個獎項嘅得主巧合又未必係巧合地均以原住民語言演唱。今屆金音 #最佳民謠專輯 《戇仔船》由 #米莎Misa 與東京中央線樂團樂手大竹研、早川徹、福島紀明合作,苗栗長大嘅佢唱四縣腔客語,即係客家話嘅其中一條分支,曾經講過「以華語創作難以表現自身獨有的情感」。

其實同樣mindset早喺1994年嘅浸大AC Hall已經出現過: #我採用依一種語言 #只係希望你地明白多一點點 #明白多一點 —— 但呢首〈究竟應該點〉當年有冇喺任何頒獎禮被提及過?

至於贏得 #最佳民謠歌曲 嘅 #葛西瓦 ,喺當地最出位嘅往績應該係2018年於另一頒獎禮上以排灣族母語rap出一首〈台灣早就有嘻哈〉。今次攞獎呢首〈好好走〉依然係饒舌作品,令人可以體會到民謠嘅現代性,而且feature同族嘅 #瑪斯卡 ,將族人嘅生死觀都寫埋入去;當 #民族意識 喺香港仍處於萌芽階段時,有需要參考台灣文化如何作多樣性發展 —— 尤其我哋時間無多。

生死同樣係 #最佳嘻哈專輯《像我們這樣的騙子》命題之一,#張伍 嘅作品有種邪釘嘅cult味,唔會係市場上最易入口果批,而睇返佢喺 Spotify、YouTube、KKBox 嘅播放數字的確不算出眾。呢點正正係金音改由主席組成評審團嘅優點,平衡利益衝突,理論上完全從音樂創作層面出發,有利於發掘同一類型下其他風格面向嘅優秀作品,對海外觀眾嚟講能做到「哦,原來台灣有呢啲」嘅驚艷效果。對香港觀眾嚟講,多數會好奇點解兩個R&B類型大獎都唔係由 9m88 或 ØZI 贏呢?咁就會令你更想知道以三個獎項成為今年金音最大贏家嘅 J.Sheon 到底是何許人也。

調返轉嚟講,金音亦會逆向令台灣本地觀眾接觸到更多海外嘅音樂單位,例如入圍 #最佳另類流行專輯獎 嘅香港歌手 #SOPHY王嘉儀

最後想提提電音類型,今年分別由 #Ń7ä 以及 #SoniaCalico(Go Chic)贏得最佳專輯及歌曲獎,聽住前者嘅〈Maroon〉時,不期然諗起香港嘅 Kelvin T、ASJ,甚至澳門嘅 AChun —— 非舞曲類嘅電音生意向來都唔好做,但就算未有市場關注,都起碼應該有來自業界嘅認可 —— 台灣就透過金音獎做到了。

對於追捧本地音樂生態嘅樂迷嚟講,或者佢哋最終都係希望自己心水單位入圍又或者得獎,但喺具一定權威性嘅評審結果下,能夠引導樂迷思考每個得獎者嘅過人之處,從而達至對音樂更深入嘅理解方式。一個地方嘅音樂場境,尤其獨立音樂場景要健康成長,一群注重質素嘅open mind就係最肥沃嘅土壤。

一個敵人比朋友多嘅星球:Matt Force 新歌背後嘅殺子文化與紀錄

都一個禮拜有多了,大家應該已經睇咗 Wildstyle 同 Clockenflap 合作嘅兩段live session,打頭陣嘅 Matt Force 除咗玩〈告別〉以外,仲正式發表一首新歌〈Hostile Planet〉(嗱嗱嗱,fans實會話佢最先喺七月「TONE」已經玩過一次㗎,但今次係official嘛)。


聽 Matt Force 自不然會先畀歌詞吸引,而第一轉聽〈Hostile Planet〉最有印象嘅係「殺子」呢兩個字。即時諗起嘅係評論界健筆,李怡,於2018年發表一篇名為《「殺子」文化》嘅文章,重提孫隆基關於「殺子」嘅解讀,認為呢個中華文化深層結構,正正係近二百年中國地區長年落後嘅原因;佢嘅論述大概係講中國人自古百行以孝為先,做晚輩嘅無論如何都要孝「順」,就算幾廿歲人血氣方剛一樣要聽教聽話,直至你老了,成為「父輩」換位再撚自己嘅下一代為止。

張藝謀喺《滿城盡帶黃金甲》中有一句對白點出呢套思維嘅精髓:朕不給你不能搶 —— 年輕人想話事,就係搶嘢。呢套嘢自堯舜時代已經run緊,起碼都run咗4100年了,中國社會嘅上一代與下一代永遠處於權力鬥爭之中,一路傳承,逐漸凝聚成 Matt Force 所指嘅敵意(hostile)基因。點解當年《古惑仔》系列咁受歡迎?因為睇住年輕貌美嘅陳浩南上位,爽吖嘛。


(呢篇文寫到一半,就傳來黃之鋒周庭林朗彥承認去年621包圍警總一事嘅相關控罪,或將即時入獄。殺子,對香港人嚟講只會係愈來愈常見嘅壓力,當年李怡篇文最尾都加咗句:梁振英、林鄭,看來得到「殺子」文化的真傳了。真,珍珠都無咁真。)

面對一個無時無刻都恐嚇要放棄年輕人嘅社會結構,又到底該如何自處,Matt 喺詞中表達咗自己嘅睇法:

要根治 就唔只今次
發誓要走上金字塔頂 逼佢跳bungee
往邊個方向走 知道冇得退後
往邊個方向走 知道總要戰鬥

明嘅人自然會明。與沉穩嘅控訴相比,現場版〈Hostile Planet〉可以用典雅嚟形容,展現出九十年代美國東岸boom bap風格以外嘅另一面,Matt 曾經喺IG問答環節講過日本jazzy教父 #Nujabes 對佢有好大影響,亦係 Chris Dave 同 Robert Glasper 等爵士好手嘅fans,今次live session終於可以感受得到佢對器樂演奏嘅想像。追開 Matt IG 嘅朋友都知佢好鬼中意凌晨走嚟開live彈琴,今次終於見到佢現場邊彈邊唱,佢話對自己嚟講算係一個小實驗,睇落又玩得幾輕鬆吖。


不過都要有 R.I.D.D.E.M. 同埋 Room307 托住喺底,出嚟效果先咁ok,其實拍攝當日都有去探班,見住佢哋下晝4點搞到凌晨一點,彈完又彈去攞心目中嘅畫面,事後又要mix又要剪片,都搞咗成個月(@allexchan:mix咗70幾個cut呀),唔輕鬆㗎。

問返 Allex,拍片呢個想法最初係inspired by蒙特婁迷幻樂隊 Parcels 年初嘅《Live Vol. 1》,睇完之後好想拍一條自己覺得靚嘅live片,就撩埋 Matt Force 一齊租 #117A 個studio錄嘢,協商後更得到 Clockenflap 資金support。


Room307 同樣係玩兩首,分別有〈背山望海〉及〈MkSadBoyKowNgDouLuiAsUsual〉,編曲相比錄音版本明顯有野心得多,前者嘅bassline變得十分肥美,lead guitar嘅音色調整得更加濕潤,第二次副歌後爆到尾亦因為有鼓手 Akira (@akira.mimasu.design) 加持,好好力;而後者就直程係第二首歌咁滯,唔介紹,自己聽啦。如果你未現場睇過 Room307,呢條片可以展現出 Room307 係一個much more than bedroom pop嘅青年,呢點相信亦係 Allex 想要紀錄自己嘅初衷之一。

上週六台灣 #金馬獎 完滿結束,香港電影有不錯表現,其中聚焦中國烏坎村起義嘅《迷航》贏得最佳紀錄片。一如影評人所說,我哋正處於一個亂世嘅起步階段,無論係香港抑或全世界,都將會有更多人重視並投入「紀錄片」嘅製作,渴望透過大銀幕又或手機屏幕展示真實畫面(aka:真相)。

2020年,係健康比公民自由更優先嘅一年,整個演出產業都搬咗上網,有 Travis Scott 嘅虛擬實驗,Glastonbury 同 Fuji Rock 等音樂節巨頭亦翻出珍貴舊片嘗試維持熱度,香港則有我哋好佩服嘅 @stayhomekids.tv 不停開機拍攝。我哋並唔相信網上演出能夠取代現場,但喺無辦法嘅情況下,留多啲影像紀錄其實都係值得做嘅事。

台灣金音獎2020入圍單位嚟講呢,呢六個我哋特別想喺香港睇

下個禮拜就十二月喇,無論對各行各業世界抑或個人嚟講,都係例牌做總結嘅時間,而音樂層面嚟講,即係各大小頒獎禮舉行嘅日子。

自從林峯喺所謂樂壇橫空出世又消失後,香港人好似對頒獎禮已經無感覺咗好多年,此不關乎本地出產嘅音樂質素,而係大家都唔再覺得「獎」呢樣嘢有認售性,就好似果啲勳章呀乜乜盛咁,who cares。反而對國外果啲都仲會有反應,例如 Grammy,又例如韓國嘅Mnet亞洲音樂大獎


對岸嘅台灣亦有一個名稱相近嘅亞洲音樂大賞,源自第九屆金音創作獎起向國外擴充嘅轉型計劃,金音獎英文全寫為 Golden Indie Music Awards,睇名就知定位與流行音樂獎項有別,文案中亦講明係側重音樂創作本質,睇返2010年起嘅得獎及入選名單亦明顯具前瞻性。不同於香港現狀,一般普羅大眾/商業機構仍視獎項為指標,想入門搵indie嘢聽時自然會從入圍名單著手,頒獎禮對一個產業嚟講有其獨特價值。

武漢肺炎繼續嚇怕幾十億嘅未感染人口,但全球防疫no.1嘅台灣雖然因為技術問題無法進行海外演出(隔離措施衍生嘅海外藝人住宿成本,感染風險等等),各類型境內演出卻幾近全面回復正常,繼續每日零感染。身為演出搞手嘅 OC2S 當然對明年全球嘅演出業運作抱樂觀態度,亦有一直update心水對像,咁除咗我哋自己會搞嘅落日飛車(咁啱國國同張洪泰嘅《龍港 LONGONE》得到今年金音評審特別賞)之外,都喺度推薦返幾個搞到就最好,搞唔到都想喺香港睇到嘅2020金音入圍單位:

1. 蛋堡 Soft Lipa 

基本上任何時候見到蛋堡個名都會即刻幻想佢玩某幾十首歌嘅現場畫面,damn,如果老師夠力玩場四個鐘嘅live的話,我都絕對可以唔使揸水一口氣睇曬。回想2016年喺香港開始多人聽 Nujabes 時,隔個海嘅蛋堡已經係做jazzy做咗七年有多,無論係編曲sample定係玩rhyme(hit the rhyme! 找出最簡單的方法🎶)都愈玩愈有,即使拍埋 Shing02 呢啲日本大神級rapper都完全夠秤。

當年作為傳奇廠牌「顏社」嘅開國元老,帶 Leo王 及 李英宏 等人出身,到做埋老竇變咗 Soft Lipapa,杜振熙依然keep到果份幽默火氣,今年告別顏社後自資發表新碟《家常音樂》即刻入圍金音最佳專輯獎,就算題材係叫囡囡「小蛋花」第時要proud of自己有個rapper爸爸(跟你同學說 這裡饒舌特別多 這是我們家的家常音樂),父愛爆棚得嚟都可以不帶一絲老氣,任性不減當年。坦白講香港觀眾似乎咁多年來都唔係特別buy蛋堡,真係好可惜,希望有機會幫佢做多啲推廣。


2. YELLOW 


每次見到英俊又玩音樂嘅光頭男子,都不免會諗起《NANA》入面嘅阿泰,所以第一眼見到 YELLOW 主腦黃宣時,以為係玩傳統啲嘅band sound嘢。殊不知一開聲就發覺soul funk到不得了,直程帶些少二千年頭 Jamiroquai 果類嘢嘅感覺。黃宣本身係台灣圈內頗有名氣嘅製作人,曾與 9m88 等對象合作,行到幕前唔只入選最佳新人(團)獎,野獸派嘅性感台風更入圍埋最佳現場演出獎

華語音樂圈好少有呢種chok出嚟唔假嘅騷靈味,喺獨立樂團中更加少見,而呢個程度嘅演奏dynamic齋靠耳機/屋企喇叭一定無法如實表現,我哋敢寫包單係睇live比聽Spotify更精彩,睇騷唔係個個都識un,但睇 YELLOW 你一定會睇到一半兩邊望下,睇下係咪個個觀眾都好似自己聽得咁入神。


3. 美秀集團 Bisiugroup AmazingShow


老老竇竇,今年金音入圍名單中最想睇就真係美秀集團,淨係睇主音狗柏舞佢果支自製小鋼炮「台八線」都已經值回票價,難怪以《美秀集團《八寶山》演唱會》入圍最佳現場演出獎。查實上年 Detuned Radio Festival 已經請咗佢哋嚟 TTN 玩,但因為果日見攰就無睇到,諗返真係蠢過隻豬,明明美秀live係咁提神醒胃!想了解佢哋係咩風格咩形象嘅可以從〈我要你愛〉MV入手,浮誇到荒謬嘅台客搖滾舞曲,可謂同鄉前輩伍佰嘅特濃版本,喺呢個失常年代實在特別啱心水(今年見到有人將首歌剪埋《亞基拉》畫面,夾到不得了),一句「我要你為了我變壞」就已經把我攻佔 :3 

P.S. 查資料先知佢哋攞過「香港亞太青年樂隊大賽」亞軍,奇怪的知識今天又增加了.jpg


4. 熱寫生 Heat Sketch

民謠喺香港仿佛總係一件這麼遠那麼近嘅事,或者因為呢處係一個有城無鄉嘅地方?就算有都係黑色嘅……入圍今年金音最佳新人(團)獎熱寫生起先由阮眯及曾立組成,走民謠風格,後來變得愈來愈多樣化。無論係聽處女大碟《豆皮少年》抑或聽佢哋喺玉成戲院錄嘅live session,最搶耳必然係三支結他嘅交流,兩位創團成員主要以riff或單音做底,而新加入嘅主結他手張盛文(透明雜誌)總可以喺溫暖氛圍中撩出一抽刺激腦皮嘅彈奏,但喺〈青元春朗〉呢種慢版歌又會有點到即止嘅和諧表現。熱寫生IG經常post團員食嘢,而佢哋嘅歌詞亦穿插住不少食物嘅描寫,如果有機會請嚟香港,一定要帶佢哋去食好西。


5. LINION


金音獎嘅「最佳現場演出獎」有一個幾有趣嘅安排,就係會喺正式頒獎禮前,安排入選單位喺亞洲音樂大賞嘅「FEAST展演」同場battle,另外再有嘉賓加持,而其中一員就係與 YELLOW 同年入選「大團誕生」嘅 LINION。起先以「9m88 御用低音結他手」身份引起注意,雖然推出個人單曲〈Room 335〉後不時被樂迷與同樣走軟性柔情路線,因翻唱〈夏夜晚風〉而爆紅嘅 Layton Wu 作比較,但 LINION 憑住更純粹嘅R&B風格已經漸漸走出一條都會男孩路線,值得期許。

6. イルカポリス海豚刑警


除咗展演,由金音獎派生出來嘅「GIMA練團室」名單亦係發掘台灣時興樂隊/唱作人嘅好地方,今年就有我哋私心喜愛嘅 #海豚刑警,來自台南,一首〈安平之光》已經聽得出佢哋十分討人歡喜嘅任性氣質,尤其係表情多多嘅主音 #楊淑芬,彈起結他上嚟有種說不出嘅狠勁,想睇。推介海豚刑警,主要係覺得大家值得喺呢個唔開心嘅環境下開心一下。


寫呢篇推介文最大感受係每個單位嘅live片都非常易搵,而且大部分都有返咁上下view count,證明業界有心紀錄發展之餘觀眾亦樂於積極回應,咁講絕對無眨低香港個scene嘅意思畢竟 OC2S is also a part of it ———— 但真係好羨慕台灣人逐步逐步建立到一個行內行外都享受嘅大環境。

落日馬車?Sunset Rollercoaster 新碟聽後感 + 香港場門票重新上架事宜

延期至2021年4月22日嘅落日飛車香港專場,退款後剩返嘅門票依家全部放返上Tickcats重新發售

目前,香港公眾娛樂場所室內活動調整可入場人數到上限嘅75%(但限聚令繼續維持4人,防疫萬歲跳起YEAH),以Musiczone為例,上限600人就即係可以入450人,啲飛按比例賣返貴三成其實都有得做嘅 —— 希望美國大選後會有利好消息,到四月唔需要再煩呢啲肺炎嘢。

至於防疫no.1嘅台灣就連濕身音樂節都搞過幾輪了,當地本土音樂文化市場亦因鎖國而座大,眼見樂迷對金音獎嘅投入程度,竟然係令人諗起二千年頭曾經叱咤嘅 #叱咤;樂手們亦把握演出真空期潛心創作,譬落日飛車就喺上週五推出第三張大碟《SOFT STORM 柔性風暴》。


一如九月底舉行嘅《颱風騎士》台北專場預示,再次以「風」及「馬」為主視覺,唱片封面嘅颱風藏有烈馬形相,配上金屬美工字型,頗有七十年代前衛搖滾味道,與經典樂隊Camel嘅純演奏大碟《The Snow Goose》有點點相似。


然而音樂調性上則係歷來最soft嘅一次,新碟延續《Villa Vanilla》情詩格局,喜歡飛車深情浪漫一面的話,相信會寧舍中意。

譬如〈Under The Skin〉旋律上呼應 Bee Gees 首〈How Deep Is Your Love〉,先行單曲〈Candlelight〉有韓團 Hyukoh 主腦 #吳赫 獻聲,另一首〈Passerby〉亦請到菲律賓R&B製作人 Michael Seyer,兩者聲底均與國國相近,有種分靈體合唱嘅奇妙默契。


上年邀請飛車來港時,已經期待現場會有新歌聽,今次算係得償所願吧。

無痛失戀冷知識補完計劃:音樂類

同一套戲隔咗十年再入戲院睇,完來真係可以get到完全唔一樣嘅感覺。

翻譯歐美電影戲名嚟講,舊時香港肯定係華文世界做得最好嘅地區,高手們往往因應電影內容而運用意譯技巧,無論係文藝片《Lolita 一樹梨花壓海棠》、科幻片《Alien 異形》、甚至笑片《Road Trip 四仔旅行團》都有過許多經典作。其中又包括2004年上映,由 #占基利 與 #琦溫絲莉主演嘅《Eternal Sunshine of The Spotless Mind 無痛失戀》,如果按鄰近地區咁直譯為「美麗心靈的永恆陽光」,票房或者會比當年遜於預期嘅表現更差……

話說,每隔幾年歐美就會出現一套反映/影響當代人愛情觀念嘅經典電影,譬如2018年嘅《Call Me By Your Name 以你的名字呼喚我》就宣示文明社會已經進入一個愛情唔再需要分男女主角嘅年代,而2009年嘅《500 Days of Summer 戀夏五百日》則引起一整代年輕人討論到底係 Tom 傻仔還是 Summer 善變,最後明白愛情從來只有講timing而無分對錯。但如果你問起一班三字頭嘅戲迷,邊套愛情電影最經典的話,相信唔少人都會回答《無痛失戀》。

失戀痛起上嚟,唔少人都會浮現「寧願當初無識過呢個人」嘅念頭,而《無痛》就係base on呢個假設去發揮。Charlie Kauffman 天馬行空得嚟刻劃人心嘅劇本,加上法國鬼才大導 Michel Gondry 運用大量道具嘅獨門拍攝手法,築構出一段科幻得嚟又令人有切膚之痛嘅忘情之旅。畫面以外,由 Beck 翻唱 The Korgis 嘅〈Everybody’s Got to Learn Sometime〉亦成為唔少樂迷長放iPod嘅金曲。


至於由 Jon Brion 製作嘅配樂則相當受行內人好評,簡單弦樂編排,加上西班牙結他與鋼琴點綴,就能詮繹出心碎、著迷、懸疑、焦慮、困惑、純真、童年創傷、希冀、懷愐等等各種比劇本更複雜嘅情緒 —— 如今再攞隻soundtrack出嚟聽,Jon Brion 真係可以做到每一首都牽引出你一種情緒嘅效果,愈聽愈回味。


攞其中一幕做例子:喺手術進行途中,飾演診所護士嘅 Kirsten Dunst 讀出戲名來源嘅詩篇《Eloisa to Abelard》向醫生示愛,而意識清醒嘅 Joe 就身處與 Celemintine 嘅美好經歷之中,直至呢段記憶被儀器清除,Clementine 消失為止(實際上係劇組逗留紐約期間,撞正一年一度俗稱 “Elephant Walk” 嘅世界級玲玲馬戲團巡遊,導演 Gondry 即興拉隊拍成嘅魔幻場面)。短短26秒嘅結他與琴音纏綿再分裂,足以點出情侶分手後對甜蜜往事嘅思念與唏噓。


當年未上神枱嘅 Kanye West 喺睇完《無痛》後深受衝擊,於是透過所屬廠牌 Def Dam 大佬 Rick Rubin 引薦,邀請 Jon Brion 喺第二張個人大碟《Late Registration》合作,據 Jon 訪問所講,佢哋第一次見面就寫好〈Gold Digger〉嘅雛形;而往後 Jon 率領住一組二十人嘅管弦樂團,按 Kanye 要求提供相應嘅材料,再全程參與編曲工作。

如果細心聆聽的話,不難發現整張《Late Registration》帶有室內樂(chamber pop)色彩,喺十五年前嘅hip hop世界中算係相當稀有嘅質感 —— 雖然 Kanye 今時今日已經畀人當半個傻佬咁看待(mental health has always been a serious topic),但不能否定佢早期野獸式嘅音樂直覺,夠膽揀一個完全唔熟hip hop嘅人做幕後,鑄造出一張影響hip hop界最少五年嘅里程碑大碟。

仿佛係要強調《無痛》對當時新碟嘅影響,Kanye 甚至邀請導演 Michel Gondry 喺其中一首〈Diamonds From Sierra Leone〉中擔任鼓手:大家都知佢係拍MV出身,但喺與 Bjork、Radiohead、Daft Punk、The White Stripes 等大明星合作前,Gondry 起初就係幫自己嘅樂隊 Oui Oui 揸鼓棍。


Gondry 往往會將自己嘅音樂品味滲入電影之中,眼利嘅朋友大概會記得喺 Joe 進行睹物思人療程時,畫面攝入實驗藍調歌手 Tom Waits 嘅名盤《Rain Dogs》。

Jon Brion 此後繼續配樂工作之餘,都有keep住與其他rapper共事,包括以製作人身份完成 Mac Miller 今年推出嘅遺作《Circles》,後者早於2012年已經喺mixtape《Macademic》上sample過《無痛》嘅soundtrack,另外,Memoryhouse、Jay Electronica、XXYYXX、Four Visions 等單位亦有喺各自早期歌曲中引用 Jon Brion 手筆。


《無痛》最近喺香港戲院重新上映,入場仲送英文原版海報,如果未睇過嘅真係要想辦法買張飛入場傷心傷心,反省反省。

【買醉容易,買品味難】太子 BOUND 重開playlist放送

林鄭政府上月中終於進一步放寬so called防疫措施,包括酒吧在內嘅場所可以重開,營業至晚上十二時,灰姑娘就最開心啦。

咁耐冇去飲嘢,開齋梗係要揀間好少少。落bar除咗睇地段、menu同格局之外,播啲咩歌其實都好影響果晚心情,尤其是對於耳仔敏感嘅樂迷嚟講,如果鋪頭揀嘅playlist難聽/唔啱聽,真係坐唔得耐。


音樂係能夠構成店家性格嘅重要一環,譬如東京嘅 Bloody Angle 主打60至70年代嘅二線soul funk音樂,成為好此道者嘅解渴聖地;而喺唱機及音響仍然係奢侈品嘅1920年代,日本甚至有一種名為「名曲喫茶」嘅咖啡廳模式,嚴禁客人交談,只容許靜靜地聽古典樂 —— 如今僅餘涉谷道玄坂嘅 LION,以及高円寺嘅 NELKEN 健在。


喺香港,以音樂品味(唔係音樂演出)為賣點嘅酒吧絕無僅有,想飲嘢時聽見傳統主流音樂以外嘅BGM,参考圈內人嘅足跡不失為好法子。要數近五年來箇中代表,自然會諗起佐敦山林道嘅 Hillywood,以及後來轉戰太子界限街嘅 BOUND

My Little Airport 翻唱 LMF 嘅〈今宵多珍重〉時,喺YouTube落嘅相頭就係 BOUND 門面;酒吧禁令實施前,成隊 WildStyle 亦會選擇喺 BOUND 同 Triple G 過生日;除咗係 indie/hip hop 仔女嘅蒲點,其實唔少本地演出搞手都愛帶artist落去消遣,包括 Cigarette After Sex、La Femme、Christopher Owens (Girls)、BO NINGEN、Higher Brothers 都曾經係座上客。


一個大家都咁捧場嘅地方,鋪頭選播嘅音樂必然唔會失禮,禮拜五 BOUND 同客人久別重逢,唔知佢哋當時想播咩歌呢?

兩位老闆 Nathan 同阿周各有心水,前者話會由 DJ ONRA 播到 Frank Zappa(見圖),後者索性整咗個 playlist 同大家分享。

嗌交啫,唔使用劍嘅:FKA Twigs 新MV倫敦比武相愛相殺

你有冇試過因為好愛好愛一個人,所以嬲起上嚟想殺死嗰個人?你有嘅。


FKA Twigs 上個月重發2019年單曲〈sad day〉,一首適合喺2020年任何一日聽嘅歌。今次特製 MV 搵嚟曾為 Childish Gambino 執導〈This Is America〉嘅日裔 Hiro Murai 合作,拍攝一對倫敦男女相愛相殺嘅故事 —— gimmick位在於呢兩位唔耍花槍,而係耍卧虎藏龍式嘅中國劍舞。

追開 FKA Twigs 嘅,或者會以為佢舞劍係單純嘅排舞演練,但其實 Tahliah Debrett Barnett 喺2017年從子宮肌瘤症狀康復後,就開始跟一位定居洛杉磯嘅 #胡師傅 習武,主要係學套路。

今次佢應用喺MV拍攝上,導演亦相當考究,無論係吊威也嘅輕功motion、用劍尖挑水、兵器撞擊聲效、連從背後掹出寶劍等細節都甚有港式武術片功架。有情人飛簷走壁,喺西方城市夜景襯托下,詩意至極。

臨尾突變成 body-horror 去表達穿心之痛 ,配合返愛情係互相傷害嘅主題,竟然又講得通。

講到中國武打元素融入歐美MV,唔靠 Google 第一時間諗起嘅始終係 Chem Bros 喺2003年推出嘅〈Get Yourself High〉,當時導演 Joseph Kahn 將由 #羅莽 主演嘅邵氏舊片《少林與武當》加以後製,用上當時未成熟嘅CG技術,剪輯出一段音響大戰,啲人又帶耳機心口又掛boombox又乜乜盛,今日再睇依然爆腦又爽皮。


但〈sad day〉嘅愛情主題又令人諗起 M.Ward 嘅〈Chinese Translation〉,用上cutie水墨畫卡通,去詮繹大文豪 #托爾斯泰 一則關於「三大難題」嘅寓言。


其實 FKA 個MV睇到尾都唔係好聽得清〈sad day〉首歌係點,不過佢嘅表現方式向來都係遊走好聽與好睇之間,唔講咁多,去片。

【多謝大麻】傳奇地下俱樂部 XXX 班底希雲街重聚,六手聯打 online DJ set

見到大麻淨係諗起smoke呀hash呀犯法呀的話,代表該人對呢種草本藥物嘅認識只停留娛樂層面(which is fine),忽略咗佢強大嘅醫學功用及經濟效益。

而當 Netflix 都拍紀錄片介紹 LSD 及菇等致幻藥物(Yo La Tengo 配樂!),連台灣議會都開始審視應否修改相關法例嘅今時今日,若果仍然稱呼大麻為「毒品」的話……真係同中國政府會比較啱傾。睇多兩篇美國/加拿大合法化嘅新聞,都會知大麻嘅好處實在太多,多到有「買賣大麻就是公民抗命」嘅說法。

望返香港,起碼大麻成份之一:大麻二酚(CBD),係列為合法藥物。相信過去兩年凡有接觸次文化嘅朋友都好大機會聽過,接觸過,甚或係日常用家。隨住大麻合法化成為西方共識,坊間愈來愈多 CBD 類產品,最近連 JOYCE 都開始做推廣了(人哋係結束上市,唔係結業呀)。

唔少產品都以口服為方向 —— 正如1995年連載嘅漫畫《中華一番》所示,大麻自古以來都係食得落肚的 —— 其中就包括今年一月推出,一嘢賣曬2000樽嘅「Oh CBD Beer」大麻製啤酒。飲酒係好多香港人閒時放鬆下嘅手段,依家有埋抗焦慮、消炎、調整內分泌等效果,就更加係飲得杯落。

按廠方說法,甚至有飲完第二朝唔會hangover嘅「副作用」。

Oh CBD Beer 暫有三款,分為酒精濃度較低嘅 session IPA (3.5%) 以及一般 IPA (6.5%),每支含有20mg嘅CBD成份,目前只限網上購買。


好,話曬 OC2S 都係音樂文化媒體,點解一輪咀講咁多大麻呢?事關八月廿二號禮拜六晚上11點,Oh CBD Beer 聯同大麻蜂蜜品牌 The Honey Collective 3.9 以及 #白T仔,喺銅鑼灣服裝店搞現場搞咗個線上 DJ set 娛賓。但真正令我哋興奮嘅係演出陣容:Enso + Tedman Lee + Yao ,呢三個名一字排開,不禁令人想念起本地傳奇俱樂部 XXX 嘅美好時光……

夏夜晚風有妳,就是我還在等待的愛:Layton Wu 雷頓狗簽約落日飛車自家廠牌

以1994年經典電影《愛情萬歲》剪輯成MV,由台灣製作人 Layton Wu 翻唱伍佰嘅〈夏夜晚風〉算係今年第一季最驚艷,聲畫配合出不受時空限制嘅懷舊愁緒,似足 cyborg 流派嘅新浪潮復古美學。


但隨住影片因版權問題而遭 YouTube 刪除,定居芝加哥嘅 Layton 亦淡出樂迷視線,直至近日,〈夏夜晚風〉又喺 IG story 再度吹送。


原來 Layton Wu 正式與落日飛車創立嘅唱片公司「夕陽音樂」簽約,除咗預告發行首張mixtape《Summertime》,喺IG公開紀錄短片,亦將〈夏夜晚風〉上架 Spotify 及 Apple Music 等平台(之前只有得喺 bandcamp 同 soundcloud 聽)。


自從台劇《想見你》出街後,不少當地年輕人重新認識伍伯的好,繼而出現大量翻唱作品,包括 Deca Joins、徐佳瑩、八三夭、韋禮安 等等,但依然係 Layton Wu 呢首最襟聽。既捕捉到原曲嘅深情,又能夠將伍佰嘅man9肉緊轉化為softboi式溫柔,幾個簡單嘅progression就牽引出愉悅心情,落日飛車果然慧眼識新丁。


而兩者之間亦有些許淵緣:跟開飛車嘅舞台大佬 Fred(我哋早兩個post有提過)同時係 9m88 嘅 production manager,而 Layton Wu 就係 9m88 首〈愛情雨〉嘅編曲兼製作人 —— 話說 9m88 御用低音結他手 LINION 亦係上緊位嘅台灣唱作新人,曾經贏得金音獎之餘,上月尾推出嘅大碟《Leisurely》有 #陳嫺靜 及 #雷擎 助拳,主打 R&B / neo soul 風格。


至於 Layton Wu 涉獵嘅音樂元素則更加廣泛:爵士、hip hop、funk、老搖滾、blue-eyed soul、lo-fi 等等都係順手拈來,加上佢優秀嘅編寫觸覺,相信放埋去 Summer Salt、Jakob Ogawa、Triathlon、Mellow Fellow 等 lo-fi / bedroom pop 代表同台會幾good fit。

如果想進一步認識呢位飛車back嘅新面孔的話,不妨去佢嘅 #街聲 profile發掘下,總之見到朱茵撳入去聽曬佢做果堆remix就啱㗎喇。

睇得明 Michel Gondry 呢個廿幾年前嘅MV,就會睇得明《TEИƎT》

睇得明就天能,睇唔明就低能?

人類進入武漢肺炎時代後,首套全球上映嘅荷里活大片《TENET 天能》終於喺香港揭幕,Christopher Nolan 同 #華納 嘅堅持總算捱到出頭天。導演向來以扭橋見稱,今次新戲玩盡佢最偏愛嘅時空理論,有人形容為一個畫面內同時進行緊兩套戲,又有人講笑話套戲叫《TENET》係因為你要入場睇十次(TEN-ИƎT)先會明。


實際買飛睇完又覺得冇咁誇張,如果你睇戲係睇故仔唔係睇細節的話,《TENET》唔算一套特別難理解嘅科幻諜報電影(spy-fi?)。反而 Nolan 今次嘅動作場面設計真係幾考人眼力,如果驚自己睇唔明的話,不妨重溫法蘭西名導 Michel Gondry 喺1996年拍落嘅一個MV,睇下自己對「時間逆行」畫面有冇過敏反應。


〈Sugar Water〉由左右兩個split screen組成,Cibo Matto 兩位成員 #羽鳥美保 及 #本田ゆか 分別以順時序動作,以及逆時序出發,喺中段一場車禍後兩人交換左右位置,再返回各自嘅起點。吊詭嘅係個MV無論順住播同倒轉播時,情節動作都會係一模一樣,某程度上同《TENET》異曲同工,尤其係 Gondry 以紅藍去區分角色,巧合地fit返《TENET》最後果場大戰嘅某樣安排。

番返去睇唔睇得明《TENET》嘅迷思:如果你答得出〈Sugar Water〉到底用咗幾多部攝影機,而又總共用咗幾多分鐘嘅footage的話,咁你就可以放心入場喇。提示:Cibo Matto 有喺訪問提過最後喺玻璃上寫字果一幕最考功夫,重拍咗10次以上先至寫啱方向同次序。


電影喺全球開畫兩星期後,大多數外國網民反而係諗起嘻哈名團 The Pharcyde 嘅經典MV〈Drop〉。導演 Spike Jonze 無好似 Gondry 咁玩順流逆流,單純由頭rewind到尾,但全隊 The Pharcyde 都要學識反轉跳舞同夾嘴形,執行上比起〈Sugar Water〉高難度得多 —— 可想而知,入戲院淨係睇《TENET》啲動作場面都抵。

加上瑞典樂手 Ludwig Göransson 今次為《TENET》編寫嘅配樂壓迫感一流,既能增強動作場面嘅魄力,亦彌補到 Nolan 今次捕捉情感較為失色嘅缺憾,要喺戲院聽先至原汁原味。