What Kinda Music

TOM MISCH & YUSSEF DAYES

– 坦白講,呢隻冇乜fun fact可以吹,只係一隻完成度極高嘅 jazzy soul dreamy R&B 專輯
– 可以偷懶形容為更鬆軟,更易食嘅 BADBADNOTGOOD
– 整體上比 Tom Misch 上一隻大碟《Geography》更加夢幻,層次分明但輕盈
– 亦係南倫敦爵士大名 Yussef Dayes 深潛多時嘅首張完整錄音作品
– 啲結他solo都幾英雄主義,唔怪得 John Mayer 咁中意佢
– Yussef 手鼓玩groove高手得嚟好易入耳
– 三位嘉賓 Freedie Gibbs、Rocco Palladino、 Kaidi Akinnibi 各自表現出色

如果才華可以抗疫,咁呢隻 Tom Misch 聯乘 Yussef Dayes 嘅大碟《What Kinda Music》起碼可以幫成個英國頂返兩三個月。

兩位同樣出身倫敦南部,前者係近五年來有口皆碑嘅 multi-instrumentalist,以靚beat充滿時尚感R&B,上年起聲勢已經直追同一派系嘅 FKJ;後者來自前衛爵士名團 Yussef Kamaal ,係近十年當地最重要嘅旗手之一,話哂係同鄉,相信兩位才子早已惺惺相惜情不自禁,今次終於有機會行埋格劍。

Tom Misch 兩年前推出嘅處男大碟《Geography》好聽還好聽,但用聲稍嫌太過乾淨企理,冇乜人味;今次有 Yussef 負責做beat控場,氛圍偏向深邃晦暗,包返實 Tom 嘅一把登台級靚聲,成隻碟嗒落有底有面,襟聽好多。

兩位高手揉合 electronica、舊派嘻哈,實驗、guitar hero 等不同元素,尤其係 Yussef 帶嚟嘅深層滲透,令 Tom Misch 本身已經有點jazzy色彩嘅風格,進化為易入口嘅前衛爵士。加入客席樂手嘅三首作品 : Nightrider、Lift Off、Storm Before The Calm 可以話係全碟highlight位,充份發揮 Tom 嘅製作人基因;而大碟同名曲〈What Kinda Music〉就最表現到 Yussef 用節奏突顯旋律嘅加乘作用,個小提琴入得好淒美呢。

兩位今次合作愉快,亦係近代「夾嘢」呢個創作模式嘅轉變寫照:以前夾band最緊要夾人,無論化學作用有幾勁,若然人唔夾,終究會好似 Kobe 同 O’Neal 咁分道揚鏢。然而嚟到2020年,大部分音樂人都有獨自實踐創作嘅能力,變相大家有咩新作想要取長補短,只需要搵啱咀型啱理念嘅同行短暫合作,互相feature,基本上隔住幾個傷心太平洋都一樣work;往往蜜月期未過就已經完成作品,無需深交,就算唔啱都係一次咁大把,確係有彈性得多。